Теннис: Полина Кудерметова Лондонда порламоқда
Теннисчиларимиз учун Лондон кортларидаги беллашувлар омадли ўтмоқда
Лондон шаҳрида теннис бўйича "Катта дубулға" туркумига кирувчи, умумий мукофот жамғармаси 86 миллион долларни ташкил этган Уимблдон турнирининг саралаш баҳслари давом этмоқда. Унда мамлакатимиз шарафини Полина Кудерметова ҳамда Мария Тимофеева ҳимоя қилмоқда.
Саралашнинг навбатдаги босқичида Полина Кудерметова америкалик Клерви Нгуноуе устидан 6:1, 6:2 ҳисобида зафар қучган бўлса, Мария Тимофеева украиналик теннисчи Вероника Подрезни 6:4, 6:2 ҳисобида таслим этди. Энди саралашнинг сўнгги ҳал қилувчи финал ўйинида Мария Буюк Британия вакиласи Хизер Мириам Уотсон билан, Полина эса нейтрал теннисчи Алина Чараевага қарши кортга чиқади.
Маълумот учун, Лондон очиқ чемпионатининг яккалик баҳсларида асосий тўр ўйинлари 29 июнь куни бошланиб, 12 июлга қадар давом этади.
Жавоҳир Тошхўжаев, ЎзА
