Тбилисиде Өзбекстан – Грузия бизнес-форумы өтті
Тбилиси қаласында Өзбекстан мен Грузия арасындағы сауда-экономикалық, инвестициялық және өнеркәсіптік ынтымақтастықты одан әрі дамытуға арналған Өзбекстан – Грузия бизнес-форумы өтті.
Форум Өзбекстан Республикасының Президенті Шавкат Мирзиёевтің кейінгі 23 жылдағы Грузияға жасайтын алғашқы ресми мемлекеттік сапары қарсаңында ұйымдастырылды.
Іс-шараға Өзбекстан Республикасының Инвестициялар, өнеркәсіп және сауда министрі Лазиз Қудратов пен Грузияның Экономика және тұрақты даму министрі Мариам Квривишвили қатысты.
Сонымен қатар, екі елдің компаниялары, қаржы институттары, еркін индустриялық аймақтары, салалық қауымдастықтары мен консалтингтік ұйымдарының 300-ге жуық өкілі қатысты. Форум аясында Өзбекстанның инвестициялық әлеуеті, шетелдік инвесторлар үшін жасалған қолайлы жағдайлар және жүргізіліп жатқан экономикалық реформалардың нәтижелері таныстырылды.
Жиында 2017 жылдан бері Өзбекстан экономикасының көлемі екі есеге артқаны, сондай-ақ 2025 жылы елдің жалпы ішкі өнімі 7,7 пайызға өскені, ал шетелдік капиталдың қатысуымен құрылған кәсіпорындар саны шамамен 4 мыңнан 20 мыңға дейін көбейгені айтылды.
Форум барысында екі мемлекет арасындағы сауда-экономикалық ынтымақтастықты кеңейту, өзара тауар айналымын 1 миллиард долларға жеткізу, өнеркәсіптік кооперацияны дамыту, бірлескен өндірістер құру және инвестициялық жобаларды жүзеге асыру мәселелері талқыланды.
[gallery-30186]
Сонымен қатар көлік-логистика саласындағы әріптестікті, оның ішінде Орта дәліздің мүмкіндіктерін тиімді пайдалану, Поти еркін индустриялық аймағында сауда-логистикалық және өндірістік хаб құру, фармацевтика, агроөнеркәсіп, энергетика, электр техникасы, цифрлық қызметтер мен ақпараттық технологиялар салаларындағы ынтымақтастықты кеңейту перспективалары қарастырылды.
Тараптар туризм, қаржы саласындағы серіктестік пен өнеркәсіптік кооперацияны дамыту мәселелері жөнінде де пікір алмасты. Сондай-ақ B2B және G2B форматындағы кездесулер өткізіліп, бірқатар инвестициялық бастамалар талқыланды.
Форум соңында екіжақты ынтымақтастықты дамытуға бағытталған бірқатар құжаттарға қол қойылды.
суреттерді түсірген О.МИРСОАТОВ, ӨзА
