Seul uzr so‘radi: dron mojarosi ortida shaxs omili

Janubiy Koreya Prezidenti Li Chje Myon dron bilan bog‘liq hodisa uchun Shimoliy Koreyadan uzr so‘radi. Davlat rahbari aytishicha, bu harakat davlat siyosatini bildirmaydi, balki ayrim shaxslar mas’uliyatsizligi natijasidir. Seul kelajakda bunday holatlar takrorlanmasligi chorasi ko‘rilishini ta’kidladi. Mazkur bayonot hukumat yig‘inida rasman e’lon qilindi.

Tekshiruv ko‘rsatdiki, hodisada maxsus xizmat – “National Intelligence Service” xodimi va bir harbiy ishtirok etgan. Shuningdek, 30 yosh atrofidagi fuqaro dron uchirish bilan bog‘liq qonunni buzishda ayblandi. Unga nisbatan aviatsiya va milliy xavfsizlik qoidasini buzish moddasi bo‘yicha ish ochilgan. Rasmiylar bunday harakat konstitutsiyaga zidligini bildirdi.

Avvalroq Pxenyan janubdan yuborilgan dron mamlakat hududiga kirganini e’lon qilgandi. Shimolliklar voqeani “jiddiy ig‘vogarona amaliyot” sifatida baholab, dron urib tushirilganini aytgan. Seul dastlab harbiy ishtirokni inkor etgan va qarshi tergov boshlagan. Oxirgi bayonot esa vaziyatga aniqlik kiritish maqsadini ko‘zlaydi.

So‘nggi oylarda KXDR Janubiy Koreyani “dushman davlat” deb atab, o‘zaro munosabatni yanada sovutgan. Umuman, bunday holatlar mintaqadagi keskinlik kuchayishi xavfini oshiradi. Janub esa vaziyatni barqarorlashtirish, yangi mojaroning oldini olishga urinayotganini bildirmoqda.

Musulmon Ziyo, O‘zA