Сергей Фомин Хитойда яна чемпион бўлмоқчи
Хитойнинг Мааньшань шаҳрида Халқаро теннис федерацияси томонидан ташкил этилган М25 таснифидаги турнирда Ҳумоюн Султонов ва Сергей Фомин асосий тўр баҳсларида тўғридан-тўғри иштирок этаётган бўлса, Максим Шин саралаш босқичида ўз омадини синовдан ўтказмоқда.
Аниқроқ айтадиган бўлсак, Максим саралашда хитойлик Хиюан Ени, 6:2, 6:3, Хитой Тайпейи вакили Кай Ан Вуни 6:2, 6:2 ҳисобида таслим этди ва финал босқичида америкалик Мишель Жу билан рақобатлашадиган бўлди.
Асосий тўрнинг биринчи даврасига ташланган қуръа натижасига кўра, Ҳумоюн Султонов хитойлик Тианху Жанг билан куч синашиши ойдинлашди. Сергей Фомин эса саралаш босқичи ғолиби билан тўқнаш келади.
Шунингдек, Сергей Фомин жуфтликлар ўртасида қозоғистонлик Григорий Ломакин билан тандем ҳосил қилди ва улар чорак финал остонасида мезбон теннисчилар Ксан Фенг Чен ва Аоран Ванг дуэтига қарши кортга чиқади.
Эслатиб ўтамиз, ўтган ҳафтада айнан Мааньшань шаҳрида ташкил этилган М15 таснифидаги турнирнинг жуфтлик беллашувларида Ўзбекистон терма жамоаси аъзолари Сергей Фомин ва Максим Шин Хитой вакиллар Хианфенг Чен ва Аоран Ванг устидан 5:7, 6:4, 10:5 ҳисобида зафар қучган ҳолда бош совринни қўлга киритган эди.
Жавоҳир Тошхўжаев,
ЎзА
