Ўзбекистоннинг фижитал-футболчилари Россия жамоасини мағлуб этди

Пойтахтимизда фижитал-футбол бўйича Ўзбекистон ва Россия Федерациясининг энг кучли жамоалари куч синашди.

Ўтган йилги мусобақалар натижасига кўра, Ўзбекистон чемпионлигига эришган Тошкент вилоятининг “Олимпик” жамоаси Россия Федерацияси биринчилигида совриндор бўлган “АЮР” фижитал-футбол жамоаси билан тўқнаш келди.

Жорий йил Қозоғистонда ўтадиган “Келажак ўйинлари-2026” мусобақаларига тайёргарлик кўраётган ҳар икки жамоа спортнинг янги йўналиши фижитал баҳсларида ўз куч ва билимини тўлақонли намойиш этишга интилди.

Қизиқарли кечган футбол мусобақасида томонлар 3:3 ҳисобида муроса йўлини танлаган бўлса, рақамли платформада ўтган ўйинда ҳамюртларимиз 10:2 кўринишида ғалаба қозонди.

Умумий фижитал-футбол сарҳисобига кўра, 13:5 ҳисобида Россия Федерацияси жамоасини доғда қолдирган “Олимпик”чилар жамоавий ва интеллектуал салоҳият борасида белгиланган тартибда “Келажак ўйинлари-2026”га тайёргарлик олиб бораётганини намойиш этди.

Т.Рўзиев, ЎзА