АҚШ вакилини енгган Жавоҳир бугун хитойлик шахматчи билан куч синашади
Бугун, 4 апрель куни Номзодлар турнирининг 5-турида ҳамюртимиз Жавоҳир Синдоров қора доналарда хитойлик Вэй Ига қарши дона суради.
Кеча ўтказилган 4-тур баҳсида Синдоров оқ доналарда ўйнаган АҚШ вакили Ҳикару Накамурани таслим этганидан кейин халқаро шахмат оламида ўзига хос эътирофли чиқишлар амалга оширилди.
Хусусан, собиқ жаҳон чемпиони, ФИДЕ рейтинги етакчиси Магнус Карлсен Синдоровнинг ўйин услубига юқори баҳо бериб, “У турнирнинг яширин фаворитларидан бири эканлигини олдиндан тахмин қилиш мумкин эди. Лекин бунчалик кучли старт олиши катта қадам. 5 та партиядан 4,5 очко жамғариш, ростини айтсам, шов-шувли натижа. Ҳозир Германияда турнирда қатнашяпман. Мусобақадан кейин уйга бориб унинг партияларини кўриб чиқишга қизиқяпман”, дея таъкидлади.
5-тур якунларидан кейин журналистларга интервью берган Ҳикару Накамура Синдоровга қарши партиядаги мағлубият сабабларини тушунтириб берди:
“Номзодлар турнирига тайёргарлик жараёнида Синдоровга қарши ўйин услубларини олдиндан таҳлил қилиб чиққандим. Лекин афсус, мағлуб бўлдим. Бундай вазиятда Жавоҳирга қарши курашишда Магнус Карлсен ҳам қийналган бўларди”.
Бугун ўтказиладиган 5-тур мусобақалари олдидан Ж.Синдоров 4,5 очко билан етакчилик қилмоқда. Уни таъқиб этаётган Фабиано Каруана ҳисобида 3,5 очко мавжуд.
Айтиш лозим, 4-турда америкалик Каруана оқ доналарда германиялик Матиас Блюбаумни мағлуб этди. Праггнанандха- Андрей Есипенко ва Аниш Гири - Вэй И ўртасидаги учрашувларда муроса йўли танланди.
Бугун ўтадиган 5-тур баҳсларида Фабиано Каруана – Андрей Есипенко, Ҳикару Накамура – Праггнанандха, Аниш Гири – Матиас Блюбаум тўқнаш келади.
Номзодлар турнирининг аёллар мусобақасида ФИДЕ байроғи остида мусобақада қатнашаётган россиялик Катерина Лагно, украиналик Анна Музичук ва хитойлик Чжу Цзинер 3 очко билан етакчилик қилмоқда.
5-турда Чжу Цзинер – Анна Музичук, Тан Чжуни – Александра Горячкина, Катерина Лагно – Вайшали Рамешбабу, Бибисара Асаубаева – Дивья Дешмух кураш олиб боради.
14 та турдан иборат Номзодлар турнири баҳслари 16 апрелга қадар давом этади.
Тўлқин Рўзиев, ЎзА
