Oliy ta’lim muassasalari soni to‘rt barobar oshdi

O‘zbekistonda so‘nggi 35 yil davomida oliy ta’lim tizimida keng ko‘lamli o‘zgarishlar yuz berdi.

Milliy statistika qo‘mitasi ma’lumotlariga ko‘ra, 2025/2026 o‘quv yili boshida mamlakatda faoliyat yuritayotgan oliy ta’lim tashkilotlari soni filiallar bilan birga 215 tani tashkil etdi. Bu esa 1991-yildagi 52 ta oliy ta’lim muassasasiga nisbatan 4,1 barobar ko‘pdir.

1991–2015-yillar davomida oliy ta’lim muassasalari soni nisbatan sekin sur’atlarda oshib, 52 tadan 69 taga yetgan. Bu davrda 24 yil ichida atigi 17 ta yangi oliy ta’lim muassasasi tashkil etilgan.

Biroq 2016-yildan keyin sohada tub islohotlar boshlanib, yangi davlat va nodavlat oliygohlar, xorijiy universitetlar filiallari tashkil etildi.

Natijada 2020-yilda OTMlar soni 127 taga, 2021-yilda 154 taga,
2022-yilda 191 taga,
2023-yilda esa rekord daraja – 219 taga yetdi.

Bu ko‘rsatkich mamlakatda oliy ta’lim qamrovini oshirish, raqobat muhitini shakllantirish va aholining ta’lim olish imkoniyatlarini kengaytirishga qaratilgan davlat siyosati samarasi sifatida baholanmoqda.

Statistikaga ko‘ra, 2024-yilda OTMlar soni 222 ta bo‘lgan bo‘lsa, 2025-yilda bu ko‘rsatkich 215 taga tushgan. Ya’ni bir yilda 7 taga qisqarish kuzatilgan.

Mutaxassislar bu holatni ta’lim muassasalarini optimallashtirish, ayrim xususiy oliygohlar faoliyatini qayta tashkil etish yoki litsenziya talablarining kuchaytirilishi bilan izohlamoqda.

Muhayyo Toshqorayeva, O‘zA