Misr oliy ta’lim muassasasida o‘zbek tili va adabiyoti burchagi ochiladi
O‘zbekistonning Misr Arab Respublikasidagi Favqulodda va muxtor elchisi Mansurbek Qilichevning Qohira universiteti rektori professor Muhammad Sami Abdul-Sodiq bilan uchrashuvida mazkur o‘quv dargohi kutubxonasida o‘zbek tili va adabiyoti burchagini tashkil etishga qaror qilindi.
Muzokara chog‘ida tomonlar ushbu nufuzli oliy ta’lim maskani va Toshkent davlat sharqshunoslik universiteti o‘rtasidagi hamkorlikni mustahkamlash, xususan o‘zbek tilini o‘rganayotgan Misrlik talabalarni qo‘llab-quvvatlash imkoniyati muhokama qilindi. Yurtimizda Qohira universiteti filialini ochish, kelajakda qo‘shma o‘quv qo‘llanmalari yaratish istiqboli ham ko‘rib chiqildi.
Janob Muhammad Sami Abdul-Sodiq O‘zbekiston vakillarini 2025 yil fevralda o‘tkazilishi rejalashtirilgan adabiyot va madaniyat ko‘rgasmasiga taklif etdi.
O‘zA