Милана Масленкова Германияда чемпион бўлмоқчи
Германияда Халқаро теннис федерацияси томонидан аёллар ўртасида ўтказилаётган W15 таснифига кирувчи турнирда ҳамюртимиз Милана Масленкова жуфтлик ва яккалик баҳсларида муваффақиятли иштирок этмоқда.
Теннисчимиз мукофот жамғармаси 15 минг АҚШ долларини ташкил этувчи ушбу турнирнинг яккалик баҳслари асосий тўри биринчи босқичида мезбон теннисчи Фабиенне Геттвaртга қарши ўйнади. Мазкур баҳсда Милана 6:2, 7:5 ҳисобида зафар қучди ва чорак финал остонасида яна бир германиялик теннисчи Луиза Майерга қарши кортга чиқадиган бўлди.
Эслатиб ўтамиз, Милана Масленкова мусобақанинг жуфтлик беллашувларида нейтрал теннисчи Полина Лейкина билан тандем ҳосил қилиб, чорак финалда бошқа бир германиялик теннисчилар дуэти – Лаура Масер ҳамда Жоли Анжелика Абендрот жуфтлиги билан тўқнашади.
Жавоҳир Тошхўжаев, ЎзА
