Jizzax – Xitoy bozoriga yangi eshik ochdi
Xalqaro maydonda iqtisodiy hamkorlikning yangi bosqichi
Jizzax viloyati delegatsiyasining Xitoyning Sindo shahriga amalga oshirgan tashrifi hududning tashqi iqtisodiy siyosatida yangi sahifa ochdi. “Xitoyga eksport – SHHTni tanlash” mavzusida o‘tkazilgan xalqaro konferensiya Jizzax uchun nafaqat ishtirok, balki aniq natijalarga yo‘naltirilgan amaliy muloqot maydoniga aylandi.
Tadbir doirasida Shandun provinsiyasi rahbariyati bilan o‘tkazilgan ikki tomonlama uchrashuvda hamkorlikning ustuvor yo‘nalishlari ochiq va amaliy ruhda muhokama qilindi. Sanoat kooperatsiyasi, investitsiyalarni jalb etish va o‘zaro savdoni kengaytirish bo‘yicha takliflar shunchaki fikr darajasida qolmadi — ularni amalga oshirish mexanizmlari ham belgilab olindi.
Kunning ikkinchi qismida bo‘lib o‘tgan anjuman esa Jizzax delegatsiyasi uchun o‘z imkoniyatlarini namoyon qilish maydoni bo‘ldi. SHHT mamlakatlari vakillari ishtirok etgan muhokamalarda jizzaxlik mutaxassislar tomonidan to‘g‘ridan-to‘g‘ri aloqalarni yo‘lga qo‘yish, mahalliy korxonalarni xalqaro bozorlarga olib chiqish va ishbilarmonlik muhitini yangicha shakllantirishga qaratilgan aniq takliflar ilgari surildi.
Ayniqsa, “hamkorlik faqat shartnoma bilan emas, ishlaydigan mexanizm bilan mustahkamlanadi” degan yondashuv tadbir ishtirokchilarida katta qiziqish uyg‘otdi. Bu esa Jizzax delegatsiyasining faqat ishtirokchi emas, balki tashabbuskor sifatida qatnashganini ko‘rsatdi.
Konferensiya yakunida Jizzax viloyati va Shandun provinsiyasi o‘rtasida imzolangan kelishuv ushbu muloqotlarning mantiqiy davomi bo‘ldi. U hududlararo savdo-iqtisodiy aloqalarni mustahkamlash, eksport salohiyatini oshirish va yangi investitsiya loyihalarini amalga oshirish uchun mustahkam asos yaratdi.
Mutaxassislar fikricha, bu hujjat Jizzaxning tashqi bozorlarga chiqish imkoniyatlarini sezilarli darajada kengaytiradi. Eng muhimi, mahalliy ishlab chiqaruvchilar uchun Xitoy kabi yirik bozorga kirish yo‘lida amaliy platforma yaratiladi.
Abdujalol Qayumov, O‘zA
