Жаҳон шахмат ишқибозлари эътибори Кипрга қаратилмоқда
Бугун, 28 март куни Кипрда Халқаро шахмат федерацияси томонидан ўтказиладиган Номзодлар турнири мусобақасининг тантанали очилиш маросими бўлиб ўтади.
Дунёнинг энг маҳоратли 8 нафар эркак ва 8 нафар аёл гроссмейстерлари иштирокида бошланаётган Жаҳон чемпионлиги йўлида курашга чоғланган даъвогарлар орасида ҳамюртимиз, 2025 йилги жаҳон кубоги ғолиби Жавоҳир Синдоровнинг борлиги барчамизга чексиз ғурур бағишламоқда.
Номзодлар турнирида шахматчилар айланма тизимдаги баҳсларда дона суради. Яъни, ҳар бир иштирокчи бошқалар билан икки мартадан — бир марта оқ, бир марта қора доналарда куч синашади. Турнир давомида жами 14 та тур ўйинлари ташкил этилади.
Ўтган йилги нуфузли шахмат мусобақалари натижасида ҳамюртимиз Жавоҳир Синдоров, германиялик Матиас Блюбаум, ҳиндистонлик Рамешбабу Праггнанандха, АҚШлик Фабиано Каруана ва Ҳикару Накамура, нидерландиялик Аниш Гири, хитойлик Вей И, россиялик Андрей Есипенко Номзодлар турнирида қатнашиш ҳуқуқига эга чиқди.
Улар классик шахмат бўйича амалдаги жаҳон чемпиони Гукеш билан чемпионлик тожи учун кураш олиб бориш ҳуқуқига эга чиқиш йўлида баҳс олиб боради.
Аёллар ўртасидаги баҳсларда эса украиналик Анна Музичук, ҳиндистонлик Вайшали Рамешбабу, Дивья Дешмукх, хитойлик Тан Чжуни, Чжу Цзинэр, россиялик Катерина Лагно ва Александра Горячкина, қозоғистонлик Бибисара Ассаубаева, хитойлик Цзю Вэньцзюн шахмат тожи учун куч синашади.
ФИДЕ томонидан эълон қилинган қуръа натижаларига кўра, эртага ўтказиладиган 1-тур мусобақасида Синдоров қора доналарда Есипенко билан куч синашади. Шунингдек, Блюбаум — Вей И, Праггнанандха — Гири, Каруана — Накамура қарама-қаршилигидаги ўйинлар бўлиб ўтади.
Аёллар ўртасида кечадиган дастлабки турда Дивья Дешмукх — Анна Музичук, Вайшали Рамешбабу — Бибисара Асаубаева, Александра Горячкина —Катерина Лагно, Чжу Цзинер — Тан Чжуни рўбарў келишади.
Мусобақалар 16 апрелга қадар давом этади.
Тўлқин Рўзиев, ЎзА
