Ҳиндистон "Telegram"дан қароқчилик қилмасликни сўради
Ҳиндистон Ахборот ва телерадиоэшиттириш вазирлиги “Telegram” мессенжерига расмий огоҳлантириш хати юборди.
Мактубда платформа орқали фильм, сериал ва онлайн-кинотеатр маҳсулоти ноқонуний тарқатилишига зудлик билан чек қўйиш талаб қилинган. Бу ҳақда ANI агентлиги хабар берган. Вазирлик мессенжер маъмуриятидан қароқчилик билан шуғулланувчи канал, гуруҳ ва ботларни тўсиб қўйиш, амалга оширилган ишлар юзасидан 15 кун ичида ҳисобот топширишни сўраган.
Нью-Деҳли расмийлари таъкидлашича, “Telegram” фақат шикоят тушгандагина контентни ўчириш билан чекланмай, балки муаллифлик ҳуқуқи бузилишининг олдини олувчи доимий тизимни йўлга қўйиши шарт. Шунингдек, қонунни қайта-қайта бузаётган маъмурларга нисбатан қатъий чора кўриш ва ҳуқуқ эгалари билан тезкор алоқа тизимини яхшилаш талаб этилмоқда.
Ф.Яхшибоева, ЎзА
