FOTOGALEREYA: Toshkent viloyati — taraqqiyotning yangi manzillari
Mustaqilligimizning 35 yilligi oldidan
«Yagona Vatan, yagona xalq bo‘lib, yangi hayot
va kelajak yaratamiz!»
Poytaxtga tutash hudud. Bu oddiy geografik ta’rif emas, balki Toshkent viloyatining bugungi iqtisodiy va ijtimoiy qiyofasini belgilab beradigan muhim omillardan biri. Poytaxt bilan chambarchas bog‘langan viloyatda sanoat, qurilish, transport, xizmat ko‘rsatish va qishloq xo‘jaligi bir-birini to‘ldirib, yangi taraqqiyot manzillarini shakllantirmoqda.
So‘nggi yillarda viloyat shahar va tumanlarida keng ko‘lamli bunyodkorlik ishlari avj oldi. Yangi turar joylar, zamonaviy ijtimoiy ob’ektlar, yo‘llar va muhandislik tarmoqlari barpo etilib, aholi uchun qulay yashash muhitini yaratishga qaratilgan loyihalar ko‘lami kengaydi.
[gallery-31119]
Toshkent viloyatining iqtisodiy qiyofasida sanoat alohida o‘rin tutadi. Yangi korxonalar, ishlab chiqarish majmualari va sanoat zonalari hududlarning ixtisoslashuvini boyitib, mahalliy imkoniyatlarni ishga solish uchun yangi maydonlarni ochmoqda. Ishlab chiqarishda zamonaviy texnologiyalarning qo‘llanishi mahsulot turlarini ko‘paytirish, raqobatbardoshlikni oshirish va eksport salohiyatini yuksaltirishga xizmat qilmoqda.
Qishloq xo‘jaligida ham yangicha yondashuvlar ustuvor. Intensiv bog‘lar, zamonaviy issiqxonalar, suv tejovchi texnologiyalar va qayta ishlash korxonalari agrar tarmoqning yangi qiyofasini belgilamoqda. Dala va bog‘lardagi mehnat jarayoni sanoat va agrologistika imkoniyatlari bilan uyg‘unlashib, mahsulotni yetishtirishdan tortib tayyorlash va bozorga yetkazishgacha bo‘lgan zanjirni mustahkamlamoqda.
Toshkent viloyatining yana bir muhim jihati — tabiat va zamonaviy hayot uyg‘unligi. Chorvoq, Bo‘stonliq tog‘lari, so‘lim daralar va dam olish maskanlari turizm uchun katta imkoniyat yaratadi. Bu hududlarda yangi sayyohlik ob’ektlari, mehmonxonalar va xizmat ko‘rsatish infratuzilmasi barpo etilayotgani viloyatning turistik qiyofasini yanada boyitmoqda.
Ta’lim, tibbiyot, sport va ijtimoiy sohadagi o‘zgarishlar esa taraqqiyotning inson hayotidagi aksidir. Yangi maktablar va ta’lim muassasalari, zamonaviy tibbiyot ob’ektlari, sport maydonlari va obod mahallalar — viloyatdagi yangilanishlarning kundalik hayotdagi ko‘rinishlaridir.
Ushbu fotogalereya Toshkent viloyatining ana shu turfa qiyofasini — zamonaviy korxonadagi ish jarayonidan tortib daladagi mehnatgacha, yangi bunyodkorlikdan tog‘ bag‘ridagi sayyohlik maskanlarigacha bo‘lgan manzaralarni bir joyga jamlaydi.
Toshkent viloyati bugun poytaxt atrofidagi hudud emas, balki sanoat, investitsiya, tadbirkorlik, turizm va inson kapitali uchun tobora yangi imkoniyatlar yaratayotgan yirik taraqqiyot makonidir.
Asliddin ALIJONOV(surat),O‘zA
