Эрдоған етакчиларга ўқотар қурол совға қилди
Шимолий Атлантика шартномаси ташкилоти (НАТО) саммити якунланганидан сўнг, Туркия президенти Режеп Таййип Эрдоған иштирокчи давлат раҳбарларига кутилмаган совға тақдим этди.
Ёғоч қути ичига жойланган, қабул қилувчининг номи ўйиб ёзилган “Gümüşay .357 Magnum” — Туркияда ишлаб чиқарилган револьвер ва унга мос олтита ҳақиқий ўқ айрим делегациялар хавфсизлик хизматларини саросимага солди.
Қуролларнинг мамлакатларга қандай олиб кирилиши масаласи ҳам алоҳида муҳокамага айланди.
Британия бош вазири Кир Стармер, Бельгия бош вазири Барт де Вевер ва бошқа етакчилар совға қутисини ватанларига қайтгач очган. Канада бош вазири Марк Карни эса ҳазил аралаш ўзининг заранг шарбати бундай совға олдида жуда “камтарона” кўринишини айтди.
Туркия президенти администрацияси совға берилганини тасдиқлади, аммо бу қарор юзасидан қўшимча изоҳ бермади. Экспертлар фикрича, давлат раҳбарларига безакли ўқотар қурол ҳадя қилиш дипломатия тарихида янгилик эмас. XIX асрда америкалик қуролсоз Самюэл Колт Усмонлилар султони Абдулмажид I ва Россия подшоси Николай I га махсус безатилган револьверлар ҳадя этган.
2019 йилда эса Чехия бош вазири Андрей Бабиш АҚШ президенти Дональд Трампга “CZ 75” — Чехияда ишлаб чиқарилган машҳур ярим автоматик пистолетнинг махсус олтин суви юритилган намунасини совға қилган эди. Таҳлилчиларга кўра, Эрдоғаннинг бу қадами дипломатик рамз билан чекланмайди.
Туркия сўнгги йилларда енгил ўқотар қуроллар экспорти бўйича жаҳонда етакчи давлатлардан бирига айлангани боис, бундай совға маҳаллий қуролсозлик саноатини тарғиб қилиш воситаси сифатида ҳам баҳоланмоқда. Айрим давлатлар тақдим этилган револьверларни музейларга топширишини билдирган бўлса, бошқалари уларни дипломатик совғалар жамғармасида сақлашга қарор қилди.
Мусулмон Зиё, ЎзА
