АҚШ разведкаси: Россия НАТО мамлакатига ҳужум қилиши мумкин
Россия Президенти Владимир Путин НАТОнинг жамоавий мудофаага тайёргарлигини Альянс мамлакатларидан бирига чекланган ҳужум билан синаб кўришга уриниши мумкин, дея хабар тарқатди “The Wall Street Journal” АҚШ разведкаси ва расмийлари янги хулосасига таяниб.
Илгари Вашингтон Украина билан уруш давом этар экан, Путин НАТОни қўзғатмайди дея тахмин қилган эди. Бинобарин, айни тахмин йил бошида ўзгарган. Америкалик таҳлилчилар фикрича, Россияга босим ва Украина ҳал қилувчи муваффақиятсизликка учраган тақдирда Кремль Альянснинг бирлиги ва АҚШ жавобини синаб кўриш умидида хавфлироқ ҳаракатни амалга ошириши мумкин.
Эҳтимолий сценарий кенг кўламли кибер ҳужум ва номаълум қуролли гуруҳлар ҳаракатидан тортиб, НАТО шарқий қанотига қисман бостириб киришгача бўлган ҳаракатни ўз ичига олади. АҚШ разведка идоралари томонидан кўриб чиқилаётган вақт оралиғи 2026 йил кузидан 2029 йилгача.
Қуруқлик орқали бевосита босқин эҳтимоли паст баҳоланмоқда. Таҳлилчилар вақт ўтиши билан бундай услуб ҳам эҳтимолдан холи эмас, деб ҳисоблайди.
С.Раҳимов, ЎзА
