2023 жылдың 20-24 маусымында Ташкент, Самарқанд, Бұхара қалаларында Қазақстан мәдениеті күндері, 20-23 маусым аралығында Ташкентте қазақ киносының күндері өтеді.

Мәдениет және туризм министрлігі ақпарат қызметінің хабарлауынша, осынау мәдени шара бағдарламасына сәйкес, 20 маусым күні Ташкенттегі «Түркістан» өнер сарайында Қазақстанның мәдениет күндерінің ашылу салтанаты және Р. Бағланова атындағы «Қазақконцерт» мемлекеттік мекемесінің шығармашылық тобының концерттік бағдарламасы өтеді. 

Концерттік бағдарламада Қазақстан Республикасының еңбек сіңірген қайраткері Әлішер Кәрімов, халықаралық байқаулардың лауреаттары Рухия Байдүкенова, Мәди Сыздықов, «Гүлдер», «Тұран» фольклорлық-этнографиялық ансамбльдері өнер көрсетеді.

20-23 маусым аралығында өтетін кино күндері аясында Ташкенттегі Әлішер Науаи атындағы кинотеатр залдарында «Сұлтан Бейбарыс», «Мұқағали», «Дос-Мұқасан», «Время патриотов», «Паралимпиадашы», «На старте», «Лето 1941 года» көркем фильмдері, «Кенже қыз», «Бесік жыры», «Әмен аға ағашы» мультфильмдері көрсетіледі.

21 маусымда Р. Бағланова атындағы «Қазақ концерті» мемлекеттік мекемесі мен Өзбекстан мемлекеттік филармониясының ұлттық симфониялық оркестрімен бірлесіп «Folk&Symphony» атты бірлескен концерт өткізу жоспарлануда. Сондай-ақ 22 маусым Самарқанд, 23 маусымда Бұхара концерттік бағдарламалар ұйымдастыру жоспарланған. 

23 маусымда Әлішер Науаи атындағы Өзбекстан Мемлекеттік академиялық үлкен театрында Қазақстанның Мәдениет күндерінің жабылу салтанаты мен Абай атындағы Қазақ ұлттық опера және балет театрының «Абай» спектаклі қойылуы көзделген.