Өзбекстан Президенті АҚШ Конгресі Өкілдер палатасының делегациясын қабылдады
Өзбекстан Республикасының Президенті Шавкат Мирзиёев Америка Құрама Штаттары Конгресі Өкілдер палатасының конгрессмендер Джейсон Смит, Грег Мерфи, Ронни Джексон және Эдвард Кейс бастаған делегациясын қабылдады.
Кездесу басында америкалық заң шығарушылар Өзбекстан Президенті мен халқын ел тәуелсіздігінің 35 жылдығымен құттықтады.
Кездесуде Өзбекстан мен АҚШ арасындағы стратегиялық серіктестікті одан әрі нығайту және парламенттер арасындағы ынтымақтастықты дамыту мәселелері қаралды.
Тараптар екіжақты қарым-қатынастардың оң қарқын алып отырғанын, саяси диалогтың жоғары деңгейде екенін, байланыстар мен өзара сапарлардың жандана түскенін атап өтті. Екі ел басшылары жақында телефон арқылы сөйлесіп, стратегиялық серіктестікті одан әрі кеңейтудің басым бағыттарын айқындаған болатын.
Сауда-экономикалық ынтымақтастықты дамытуға ерекше назар аударылды. Жыл басынан бері өзара сауда көлемі 20 пайызға өсті. Энергетика, маңызды минералдар, көлік, ауыл шаруашылығы, цифрлық технологиялар және өнеркәсіп салаларында ірі жобаларды іске қосып, жүзеге асыруды көздейтін үш жылдық Экономикалық ынтымақтастық бағдарламасы дәйекті түрде жүзеге асырылуда.
Өзбекстанда жүзеге асырылып жатқан ауқымды реформаларды қолдауда, сондай-ақ екі ел арасындағы сындарлы әрі өзара тиімді диалогты ілгерілетуде АҚШ Конгресінің маңызды рөлі атап өтілді.
Өңіраралық ынтымақтастықты кеңейтуге де айрықша көңіл бөлінді. АҚШ делегациясының мүшелері өкілдік ететін Миссури, Солтүстік Каролина, Техас және Гавайи штаттарымен тікелей байланыстарды одан әрі дамытуға және бірлескен жобаларды жүзеге асыруға дайын екені айтылды.
Тараптар өңірлік және халықаралық маңызы бар өзекті мәселелер жөнінде де пікір алмасты.
Кездесу соңында іскерлік миссиялардың өзара сапарларын ұйымдастыру жөнінде уағдаластыққа қол жеткізілді.
