Алматыда өткен ресми шарада Өзбекстанның «Узбекнефтгаз» АҚ мен Қазақстанның «ҚазМұнайГаз» ұлттық компаниясы мұнай-газ саласындағы әріптестікті тереңдетуге бағытталған маңызды келісімге қол қойды.

Бұл құжат екі елдің энергетика саласындағы байланысын жаңа деңгейге көтеріп, ұзақ мерзімді стратегиялық серіктестікті нығайтуды көздейді. Келісім аясында екі ел сарапшылары өзара тәжірибе алмасып, жаңа жобаларды бірлесіп жүзеге асыру үшін тұрақты диалог орнатады.

Сонымен қатар, жобалардың географиясын кеңейту, табиғи ресурстарды тиімді пайдалану, өндірістік және көліктік инфрақұрылымдарды оңтайландыру мүмкіндіктері қарастырылған.

Сала мамандарының күшін біріктіру нәтижесінде екі тарапқа да тиімді нақты шешімдер мен жаңа бастамалар әзірленбек. Бұл қадам Өзбекстан мен Қазақстан арасындағы өзара сенімді арттырып, Орталық Азиядағы энергетикалық әріптестікті одан әрі дамытуға серпін береді.

«Узбекнефтгаз» АҚ баспасөз қызметінің мәлімдеуінше, бұл келісім энергетика саласындағы ынтымақтастықтың келешегіне жол ашып, аймақтық интеграцияны нығайтуға да өз үлесін қосады.