Өзбекстан мен Оңтүстік Корея құрылыс саласындағы ынтымақтастықты кеңейтуде
Өзбекстан мен Оңтүстік Корея арасындағы қарым-қатынастар соңғы жылдары қарқынды дамып келеді. Екі ел сауда-экономикалық байланыстарды нығайтып қана қоймай, инвестиция, технология, білім беру, инфрақұрылым және кадр даярлау бағыттарындағы бірлескен жобаларды да кеңейтіп отыр.
Әсіресе Оңтүстік Кореяның озық технологиялары мен тәжірибесін Өзбекстан экономикасының түрлі салаларына енгізуге ерекше мән берілуде. Бұл ретте құрылыс және тұрғын үй-коммуналдық шаруашылық салаларындағы ынтымақтастық та екіжақты серіктестіктің маңызды бағыттарының біріне айналған.
Осы бағыттағы өзара байланысты одан әрі дамыту мақсатында Құрылыс және тұрғын үй-коммуналдық шаруашылық министрлігінде Оңтүстік Кореяның KDI — Корея даму институты өкілдерінен құралған делегациямен кездесу өтті.
Кездесу барысында Корея үкіметінің KSP (Knowledge Sharing Program) біліктілікті арттыру және тәжірибе алмасуға бағытталған гранттық бағдарламасы, сондай-ақ Кореяның қаржы институттарын Өзбекстанда жүзеге асырылып жатқан инфрақұрылымдық жобаларға тарту мәселелері талқыланды.
Кездесуде министрлік өкілдері құрылыс және тұрғын үй-коммуналдық шаруашылық салаларында жүргізіліп жатқан реформалар, басым бағыттар мен алдағы міндеттер туралы жан-жақты ақпарат берді.
Тараптар өзара тәжірибе алмасу, заманауи тәсілдерді енгізу, сондай-ақ инфрақұрылымдық жобаларды қаржыландыру бағыттарындағы ынтымақтастықты одан әрі дамытуға мүдделі екенін білдірді.
Айта кетейік, KDI — Оңтүстік Кореяда ауқымды саяси зерттеулер жүргізетін жетекші ғылыми-зерттеу институттарының бірі. Институт KSP гранттық бағдарламасы аясында әлемнің 100-ден астам елінде түрлі жобаларды жүзеге асырған.
Өзбекстан бұл ынтымақтастықта ерекше орын алады. Атап айтқанда, 2004 жылдан бері елде Корея гранттары есебінен 26 жоба жүзеге асырылған.
