Велоспортчиларимизнинг Осиё чемпионатидаги медаллари сони 2 тага етди
20 дан зиёд давлатнинг энг маҳоратли велоспортчилари иштирокида Филиппинда ўтаётган велотрек бўйича Осиё чемпионатининг ортда қолган баҳсларида терма жамоамиз аъзолари навбатдаги медални қўлга киритди.
Чемпионатнинг эркаклар ўртасида ўтказилган “Elimination” дастури пойга баҳсларида терма жамоамиз аъзоси Никита Светков бронза медалига эга чиқди.
Мазкур йўналишда олтин медаль япониялик Еия Яшимотога, кумуш медаль эса Хитой вакили Жундие Вуга тегишли бўлди.
Эслатиб ўтамиз, қитъа чемпионатининг илк кунида жамоавий пойгалар дастурида Ўзбекистон қизлар терма жамоаси аъзолари 3-ўринни эгаллаган эди. Ҳозирда велоспортчиларимизнинг Осиё биринчилигидаги медаллари сони 2 тага етди.
Мусобақалар 31 мартга қадар давом этади.
Т.Рўзиев,
ЎзА
