Украина ва Польша FIFA Жаҳон чемпионатини бирга ўтказмоқчи
Украина ва Польша давлатлари футбол бўйича жаҳон чемпионатини биргаликда ўтказиш масаласини муҳокама қила бошлади. Бу ҳақда “Politico” нашри Украина спорт вазири Матвей Биднийга таяниб хабар берган. Мулозим "Евро-2012" мусобақасига ишора қилиб, мамлакат йирик спорт анжуманларини ўтказиш тажрибасига эгалигини эслатган.
Бидний мундиал учун кейинги эҳтимолий сана 2040-йиллар бўлиш, ҳозирги режа шу нуқтаи назардан тузилиши лозимлигини қўшимча қилди.
Маълумки, ЖЧни 2030 йил Испания, Португалия ва Марокаш, 2035 йил Саудия Арабистони қабул қилиши белгиланган.
Эндиги қўшма мезбонлик моҳиятан 2012 йилдаги Европа чемпионати финал босқичидан сезиларли даражада фарқ қилади, чунки Россия билан урушдан кейин инфратузилмани тиклаш тахминан 588 миллиард доллар талаб қилади. Бу миқдор Украинанинг 2025 йилга мўлжалланган ялпи ички маҳсулоти қийматидан қарийб уч баробар кўп.
Шунингдек, нашр Украинанинг энг йирик стадионларидан бири бўлган “Донбасс Арена” ҳозир ишғол қилинган ҳудудда эканига эътибор қаратган. Бу майдонда “Евро-2012” дастурининг 5 ўйини ўтказилган. Бундан ташқари, журналистлар Украина ва Польшанинг айни ҳамкорлиги икки мамлакат ўртасида тарихий хотира билан боғлиқ кескинлик кучайган бир пайт юз бериши мумкинлигига ҳам урғу бермоқда.
С.Раҳимов, ЎзА
