Теҳрон Ҳормуз бўғозини ёпиш ниятида эмас (+видео)
Эроннинг БМТдаги элчиси Али Баҳрейнийнинг Euronewsга маълум қилишича, Теҳрон Ҳормуз бўғозини блоклаш ёки уни миналашни режалаштирмаяпти.
Элчининг айтишича, бу ҳудуддаги вазият минтақадаги уруш туфайли кескинлашган.
“Эрон Ҳормуз бўғозини ёпишни истамайди. Бу ердаги ҳолат минтақадаги уруш билан боғлиқ. Бўғоз атрофида жанглар ва отишмалар кетяпти”, -деди Баҳрейний.
Янги олий раҳбар Можтаба Ҳумонаий элчининг интервьюсидан бир неча соат олдин Эрон душманларига босим ўтказиш учун Ҳормуз бўғозини ёпиқ ҳолда ушлаб туришга қасамёд қилган.
Можтаба Ҳумонаий уруш бошланганидан бери омма олдида кўринмаган.
Хабарларга кўра, 28 февралдаги биринчи ҳужумда у яраланган бўлиши мумкин. Турли манбалар бу ҳақда турлича маълумот бермоқда: айримлари у енгил яраланганини айтса, бошқалари эса у ҳужум натижасида ҳаракат қилиш қобилиятини йўқотган бўлиши мумкинлигини билдирган.
Эроннинг БМТдаги вакили Теҳрон ҳали ҳам Ҳормуз бўғозини “тинчлик бўғози” деб ҳисоблашини айтди. Разведка маълумотларида эса Эрон ушбу муҳим сув йўлини миналашни режалаштираётгани айтилган эди.
“Биз бу йўлни хавфсиз қилишга ҳаракат қилаяпмиз”, - деди Баҳрейний. Унинг қўшимча қилишича, агар минтақада уруш бўлмаса ва ҳеч қандай таҳдид бўлмаса, бу йўл барча давлатлар кемалари учун очиқ бўлиши керак.
“Фақат Эронга қарши урушда иштирок этаётган давлатларга тегишли кемаларга нисбатан айрим чекловлар қўйилиши мумкин”, - деди у.
Ҳормуз бўғози орқали жаҳонда ташиладиган нефть ва нефть маҳсулотларининг тахминан тўртдан бири ўтади. Суюлтирилган табиий газ ташишнинг ҳам қарийб бешдан бири шу йўлдан амалга оширилади.
Эроннинг БМТ даги элчиси Ҳормуз бўғозидаги вазият жаҳон иқтисодиётига салбий таъсир қилиши мумкинлигини тан олди. Аммо у Теҳрон барибир курашни тўхтатмаслигини айтди. У Euronewsга Эрон узоқ давом этадиган урушга тайёр эканини билдирди.
Шу билан бирга, Теҳрон музокараларга ҳам тайёр эканини айтди ва дипломатиядан АҚШ воз кечганини таъкидлади.
Баҳрейнийнинг фикрича, уруш бошланганига икки ҳафта бўлганига қарамай, Вашингтон ҳозирча ютуққа эришмаган.
“АҚШ катта хатога йўл қўйди. Улар режалаштирган ишлар амалга ошмади, чунки улар Эронни бир неча кунда енгамиз деб ўйлашган”, — деди у.
<iframe width="650" height="420" src="https://www.youtube.com/embed/K6VB99WdfrY" title="Tehron Hormuz bo‘g‘ozini yopish niyatida emas" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>Кенжа Бекжонов, Улуғбек Тўхтаев, ЎзА
