Шри-Ланкада бемордан 3,1 килограммлик тош олиб ташланди
Шри-Ланкада шифокорлар 55 ёшли эркакнинг пешоб пуфагидан 3,1 килограмм оғирликдаги тошни жарроҳлик йўли билан олиб ташлади. Мутахассислар уни ҳажми ва оғирлиги жиҳатидан дунёда қайд этилган энг йирик пешоб қопи тоши бўлиши мумкин, деб ҳисобламоқда.
Бемор инсультдан кейин Тринкомали шаҳридаги шифохонага ётқизилган. Даволаниш пайтида унинг пешобида қийинчилик юзага келаётгани аниқланган. Текширув натижасида пешоб пуфагида тош борлиги маълум бўлган. Жарроҳлик вақтида олинган тошнинг катталиги туяқуш тухумига тенг бўлган.
Операцияни бошқарган шифокор Праҳалан Балакришнаннинг айтишича, бундай катта тош аввал қайд этилмаган. Унинг тахминича, тош бемор жисмида 5-10 йил давомида шаклланган. Ҳозир беморнинг аҳволи яхши, у бошқа касалликлари бўйича даволанишни давом эттирмоқда.
Тиббиётчилар таъкидлашича, инсон организмидаги тошлар пешоб таркибидаги минераллар кристаллашиб, қаттиқлашганда ҳосил бўлади. Кичик тошлар ўз-ўзидан чиқиб кетиши мумкин, аммо катталари пешоб йўлини тўсиб қўйиши ва жарроҳликни талаб қилиши мумкин. Гиннес рекордларида ҳозиргача қайд этилган энг йирик пешоб қопи тоши 2003 йилда Бразилияда олиб ташланган бўлиб, унинг оғирлиги 1,9 килограмм эди.
Мусулмон Зиё, ЎзА
