Трампнинг рейтинги рекорд даражада тушди(ми)?
Халқаро ижтимоий ва маркетинг тадқиқотлари компанияси - "Ipsos" томонидан ўтказилган сўровнома натижаларига кўра, АҚШ президенти Дональд Трампнинг фаолиятини маъқулловчи америкаликлар улуши 33 фоизгача пасайиб, унинг иккинчи муддатидаги энг паст кўрсаткични қайд этди. Бу ҳақда “Reuters” ахборот агентлиги хабар бермоқда.
Респондентларнинг 64 фоизи давлат раҳбарининг олиб бораётган сиёсатидан норози эканини билдирган бўлса, қолган аҳоли ҳали бир тўхтамга келмаган. Тадқиқотда иштирок этганларнинг 80 фоизи АҚШ ва Эрон ўртасидаги кескинлик узоқ вақт сақланиб қолишини тахмин қилмоқда, фақатгина 16 фоиз аҳоли низо бир неча ҳафта ичида барҳам топишига ишонади.
Маълумот учун, Трампнинг қўллаб-кувватланиш даражаси 2025 йилнинг январь ойида 47 фоиз билан энг юқори чўққига чиққан эди, аммо шу вақтгача унинг рейтинги 34 фоиздан пастга тушмаган эди.
Жорий йилнинг апрель ва июнь ойларида айнан шу кўрсаткич қайд этилган. Таъкидлаш жоизки, Трампнинг биринчи президентлик даврида ҳам 2017 йилнинг декабрида рейтинг 33 фоизгача пасайган эди. Мазкур сўровнома 14–17 август кунлари Қўшма Штатлар бўйлаб 1166 нафар катта ёшли фуқаролар ўртасида ўтказилган.
Ф.Яхшибоева, ЎзА
