Шерзод Шерматов Шанхайдағы Дүниежүзілік жасанды интеллект конференциясына қатысты
Қытайдың Шанхай қаласында Дүниежүзілік жасанды интеллект конференциясы (WAIC) өтіп жатыр.
Конференцияның ашылу рәсіміне Қытай Халық Республикасының Төрағасы Си Цзиньпин қатысып, жасанды интеллектіні дамыту, оны қауіпсіз әрі жауапты қолдану және осы бағыттағы халықаралық ынтымақтастықты кеңейту мәселелеріне арналған баяндама жасады.
Айтулы халықаралық шараға Өзбекстан Республикасының Цифрлық технологиялар министрі Шерзод Шерматов та қатысты.
Министрліктің мәліметінше, биылғы WAIC конференциясы аясында жасанды интеллект, цифрлық экономика, инновациялар және жаһандық AI басқаруына арналған 140-тан астам форум, панельдік сессиялар мен пікірталастар ұйымдастырылады. Оған әлемнің түрлі елдерінен 1400-ден астам сарапшы мен сала өкілі, сондай-ақ 1100-ден аса компания қатысуда.
Сонымен қатар конференция барысында 300-ден астам жаңа технологиялық өнім мен шешім алғаш рет таныстырылады.
Іс-шара аясында жасанды интеллект саласындағы халықаралық ынтымақтастықты дамыту, озық тәжірибе алмасу, AI технологияларын тәжірибеге енгізу және жаһандық басқару тетіктерін жетілдіру мәселелері талқыланбақ.
