“Royal Jordanian” Ўзбекистон ва Иорданияни тўғридан-тўғри авиақатновлар билан боғлади
Иорданиянинг миллий авиаташувчиси — “Royal Jordanian” авиакомпанияси Амман ва Тошкент ўртасида мунтазам тўғридан-тўғри йўловчи рейсларини йўлга қўйди.
Янги авиақатнов икки давлат ўртасидаги транспорт алоқаларини янада мустаҳкамлаб, туризм, бизнес ва маданий ҳамкорликни ривожлантириш учун янги имкониятлар яратмоқда.
1 июль куни маҳаллий вақт билан соат 04:10 да авиакомпаниянинг Аммандан амалга оширилган илк рейси Тошкент халқаро аэропортига қўнди. Авиация анъанасига мувофиқ, самолёт сув аркаси орқали кутиб олинди, экипаж аъзоларига гуллар берилди. Шунингдек, аэропорт терминалида “Uzbekistan Airports”, Тошкент халқаро аэропорти ҳамда “Royal Jordanian” вакиллари иштирокида янги йўналишнинг тантанали очилиш маросими бўлиб ўтди.
Энди Амман – Тошкент – Амман йўналиши бўйича парвозлар ҳафтасига икки марта — чоршанба ва якшанба кунлари амалга оширилади.
“Royal Jordanian” авиакомпаниясининг тижорат директори Карим Маҳлуфнинг таъкидлашича, янги йўналиш Ўзбекистон ва Марказий Осиё аҳолиси учун Иорданиянинг машҳур сайёҳлик масканлари — қадимий Петра шаҳри, Ўлик денгиз, Води-Рам саҳроси ва бошқа диққатга сазовор жойларга саёҳат қилиш имкониятини янада осонлаштиради. Унинг қайд этишича, мазкур йўналиш Иордания туризмини ривожлантиришга қаратилган “ExploRJordan” дастурининг бир қисми ҳисобланади.
“Uzbekistan Airports” матбуот хизматига кўра, янги авиақатновнинг очилиши Ўзбекистоннинг халқаро йўналишлар тармоғини кенгайтиришда муҳим қадам бўлиб, икки мамлакат ўртасида туризм, ишбилармонлик алоқалари ва маданий алмашинувни янада фаоллаштиришга хизмат қилади.
Янги рейс нафақат ўзбекистонлик сайёҳларга Иорданиянинг бой тарихий-маданий мероси билан яқиндан танишиш имконини беради, балки Иордания ва қўшни давлатлар фуқаролари учун ҳам Ўзбекистоннинг Самарқанд, Бухоро, Хива каби машҳур тарихий шаҳарларига қулай саёҳат қилиш имкониятини яратади.
Маълумот учун, “Royal Jordanian” Иорданиянинг миллий авиаташувчиси бўлиб, Аммандаги Қиролича Алия халқаро аэропорти базасида фаолият юритади. Компания замонавий Airbus, Boeing ва Embraer русумидаги самолётлар парки орқали Яқин Шарқ, Европа, Осиё, Африка ҳамда Шимолий Америкадаги 40 дан ортиқ йўналишга мунтазам парвозларни амалга ошириб келмоқда.
Муҳайё Тошқораева,
ЎзА
