Россия ва Украина ўртасида 205 нафар ҳарбий асир алмашилди (+видео)
Бугунги халқаро янгиликларда Россия ва Украина ўртасида 205 нафардан ҳарбий асир алмашинуви амалга оширилгани, жараён БАА воситачилигида ўтиб, Зеленский томонидан “1000 га 1000” келишувининг биринчи босқичи сифатида баҳолангани маълум бўлди.
Исроилда эса The New York Times нашрига қарши туҳмат даъвоси тайёрланаётгани, Арманистонда Россияпараст “Матрешка” тармоғи орқали кенг дезинформация кампанияси олиб борилаётгани, Боливияда эса президент истеъфосини талаб қилган оммавий норозиликлар кучайгани қайд этилди. Шу билан бирга Эрон терма жамоасига АҚШ визалари берилмаётгани футбол дипломатиясидаги муаммоларни юзага чиқарди, АҚШ ва Хитой раҳбарлари эса Пекинда савдо, Эрон, Тайвань ва Boeing масалаларини муҳокама қилиб, айрим иқтисодий келишувларга эришди, бироқ чиплар экспорти бўйича келишувсиз якунланди.
Россия ва Украина ўртасида 205 нафар ҳарбий асир алмашилди
Россия ва Украина 15-май куни “205 га 205” формуласи асосида навбатдаги ҳарбий асирлар алмашинувини амалга оширди. Россия Мудофаа вазирлиги ва Украина президенти Владимир Зеленский бу жараённи тасдиқлади. Россия томони 205 нафар ҳарбий қайтарилганини, эвазига Украина Қуролли кучларининг 205 нафар асири топширилганини билдирди. Жараёнда Бирлашган Араб Амирликлари гуманитар воситачи сифатида иштирок этди. Зеленский бу алмашинув “1000 га 1000” форматидаги кенгроқ жараённинг биринчи босқичи эканини таъкидлади.
Нетаньяху The New York Times нашрини судга бермоқчи
Исроил бош вазири Биньямин Нетаньяху ҳукумати АҚШнинг The New York Times нашрига қарши туҳмат бўйича суд даъвосини тайёрламоқда. Бунга фаластинлик маҳбусларга нисбатан жинсий зўравонлик ҳақидаги мақола сабаб бўлган. Исроил ҳукумати мақолани рад этиб, уни “бузиб кўрсатилган ёлғон” деб атади. NYT эса материал гувоҳлар ва халқаро ташкилотлар ҳисоботларига асосланганини маълум қилди.
Арманистонда “Украина сценарийси” ҳақидаги дезинформация кампанияси
Россиянинг “Матрешка” ботлар тармоғи Арманистонда парламент сайловлари арафасида кенг кўламли дезинформация кампаниясини бошлади. Тармоқ Пашинянга қарши 343 та сохта видео тарқатгани, унда унинг соғлиғи, ташқи сиёсати ва Россия билан муносабатлари ҳақидаги иддаолар илгари сурилгани айтилади. Таҳлилларга кўра, бу кампания АҚШ ва Европадаги сайловлар давридаги ўхшаш операциялардан ҳам йирикроқ бўлган.
Боливияда президент истеъфосини талаб қилиб намойишлар
Боливия пойтахти Ла Пасда кончилар ва деҳқонлар президент Родриго Пас истеъфосини талаб қилиб намойишга чиқди. Намойишчилар Мурило Плаза майдонига киришга уринган, айрим ҳолларда полицияга қарата динамит таёқчалари отилган. Мамлакатдаги иқтисодий инқироз, доллар тақчиллиги ва энергия етишмовчилиги норозиликларни кучайтирмоқда.
Эрон терма жамоасига АҚШ визаси берилмаяпти
Эрон футбол федерацияси раҳбари Меҳди Тож ЖЧ–2026 учун терма жамоа аъзоларига АҚШ визалари берилмаётганини маълум қилди. Федерация ФИФА билан музокара ўтказишни режалаштирмоқда. Эрон томони жараённи Туркияда эмас, Анталияда ташкил этишга уринаётгани айтилмоқда. Масала ҳозирча очиқ қолмоқда.
Си Цзиньпин ва Трамп учрашуви: асосий мавзулар
АҚШ президенти Дональд Трамп ва Хитой раҳбари Си Цзиньпин Пекиндаги учрашувда савдо, Эрон масаласи, Boeing самолётлари ва Тайвань мавзуларини муҳокама қилди. Томонлар савдо сулҳини сақлашга келишиб олди, Хитой 200 та Boeing самолётига буюртма беришга рози бўлди. Бироқ чиплар экспорти бўйича келишувга эришилмади. Учрашувда Эрон ва Ҳурмуз бўғози масаласи ҳам кўтарилди.
<iframe width="815" height="458" src="https://www.youtube.com/embed/n6DoAFa4q0g" title="Rossiya va Ukraina o`rtasida 205 nafar harbiy asir almashildi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>Нозимбек Мардонов, Салим Обиджонов (видео), ЎзА
