Куба АҚШнинг 100 миллион долларлик таклифига жавоб берди
Куба ҳукумати АҚШ томонидан таклиф этилган 100 миллион долларлик инсонпарварлик ёрдамини кўриб чиқишга тайёрлигини билдирса-да, бу қарор ортида сиёсий манфаат борлигидан шубҳаланмоқда.
Орол-давлат ташқи ишлар вазири Бруно Родригес ушбу ёрдам ҳеч қандай шартсиз ва Кубанинг ички ишига аралашишга уринишсиз берилиши кераклигини таъкидлаган. Айни вақтда Вашингтон жорий этган нефть қамали туфайли мамлакат энергетика тизими оғир аҳволга тушиб қолган: орол шарқида таъминот узилиб, халқ озиқ-овқат ва дори-дармон танқислигига дуч келган.
Президент Мигел Диас-Канель Вашингтон ҳам санкцияни кучайтириб, ҳам ёрдам таклиф қилишини “мантиқсизлик” деб атади ва энг катта ёрдам дарҳол иқтисодий чекловни олиб ташлаш бўлишини эслатди. Бирлашган Миллатлар Ташкилоти ҳам АҚШнинг ушбу ҳаракатини инсон ҳуқуқини бузувчи ноқонуний қамал, деб баҳолади. Икки давлат муносабати кескинлигича қолаётган, АҚШ Куба ҳукуматини ўзгартиришга интилаётган бир пайт, Гавана мазкур маблағни фақат ёнилғи ва тиббий эҳтиёж учун сарфлаш шарти билан қабул қилиши мумкинлигини очиқлади. АҚШ мулозими билан ўтказилган яширин учрашув эса вазият ҳамон мураккаблигидан дарак бермоқда.
Ф.Яхшибоева, ЎзА
