Қырғызстан жанармай экспортына толық тыйым салды
Қырғызстан ішкі нарықты жанармаймен қамтамасыз ету мақсатында елден отын өнімдерін экспорттауға толық тыйым салып, мұнай өнімдерін импорттау талаптарын жеңілдетті. Бұл туралы 13 шілдеде республика үкіметінің ресми сайтында жарияланған қаулыда айтылды.
Бұған дейін шектеулер Қырғызстаннан Еуразиялық экономикалық одақтың (ЕАЭО) кедендік аумағынан тыс елдерге жанармай шығаруға ғана қатысты болса, енді тыйым одаққа мүше мемлекеттерге экспортқа да қолданылатын болды.
Алайда нафта, мазут және пеш отынына қатысты ерекшелік сақталды. Оларды шетелде өңдеп, кейін қайта өңделген мұнай өнімдерін толық көлемде Қырғызстанға қайтару шартымен экспорттауға бұрынғыдай рұқсат етіледі. Мұндай жеткізілімдердің әрқайсысы үкіметпен жеке келісуді талап етеді.
Биыл мамыр айында Қырғызстан билігі жанармай жеткізушілерге субсидия бөлуді бастап, сатып алу бағасы мен мемлекет белгілеген баға арасындағы айырманы 30 қыркүйекке дейін өтеуді көздеген еді.
Алайда 8 шілдеде үкімет AI-95 маркалы бензин бағасын мемлекеттік реттеуді тоқтатып, бөлшек саудадағы шекті бағаға қойылған шектеуді алып тастады.
