Ўзбекистонда уюшган 22 наркожиноий гуруҳ фаолиятига чек қўйилди
Шиддат билан ўзгараётган дунёда гиёҳвандлик хавфи аҳоли генофонди учун энг катта таҳдидга айланиб бормоқда.
Давлат раҳбари томонидан аҳоли саломатлиги ва миллат генофондини гиёҳвандлик ва наркожиноятлардан самарали ҳимоя қилиш бўйича миллий дастур қабул қилинди. Наркожиноятларга қарши курашиш умуммиллий ҳаракатга айлантирилиб, жамиятда бу иллатга муросасиз муҳит яратилмоқда.
Ҳуқуқни муҳофаза қилувчи орган ходимлари томонидан ўтказилаётган комплекс тезкор чора-тадбирлар натижасида гиёҳвандликнинг олди олинмоқда.
ИИВ ахборот хизматидан маълум қилишларича, жорий йилнинг январь – февраль ойларида республикада наркотикларни ўтказиш ва тарқатиш билан шуғулланувчи уюшган 22 наркожиноий гуруҳ фаолиятига чек қўйилди. 5 нафар гуруҳ етакчиси ва 84 нафар воситачи аъзолар қўлга олинди. Шунингдек, 8 яширин нарколаборатория фош этилди.
Бу наркожиноятчиларнинг 20 нафари психотроп дориларни, 28 нафари анъанавий наркотикларни тарқатиш билан шуғулланган. 41 нафари синтетик наркотикларни тарқатишни онлайн наркодўконлар орқали амалга оширган.
2025 йил давомида 14 яширин нарколаборатория аниқланган бўлса, жорий йилнинг 2 ойи давомида 8 нарколаборатория аниқланди.
Нарколабораторияларнинг 3 таси психотроп моддаларни тайёрлаш билан шуғулланган яширин цехлар бўлса, 5 таси синтетик наркотик моддаларни тайёрловчи нарколабораторияни ташкил қилган.
Тезкор тадбирлар натижасида январь-февраль ойларида 41 кг. анъанавий наркотиклар, 100 кг.дан ортиқ синтетик наркотиклар, 1 миллион дозага тенг 200 мингга яқин психотроп дори воситалари ва 2 тоннага яқин прекурсорлар ноқонуний муомаладан олиб қўйилди.
Аниқланишича, ушбу уюшган жиноий гуруҳлар ўртача 3 ойдан 10 йилгача вақт оралиғида фаолият юритган. Бир йилда ўртача 1 миллион донадан ортиқ психотроп дори воситалари, бир йил давомида 2-2,5 тонна “гашиш” ва “опий” каби наркотик моддаларни ўтказишни амалга оширган.
Интернет наркодўкони томонидан бир йилда ўртача 350 кг., 3 йил давомида 4 миллион дозага тенг бўлган 700 - 800 кг. синтетик наркотик моддалар “закладка” усулида тарқатилган.
Наркожиноий гуруҳлар томонидан турли хилдаги гиёҳвандлик воситаларини Тошкент, Наманган, Андижон, Самарқанд, Сирдарё вилоятларининг жами 40 туман ва шаҳрида фаол тарзда тарқатиш амалга оширилган.
Наркотик моддалар савдолари трансчегаравий ва виртуал характерга эга бўлиб, юртимизга Афғонистондан Сурхондарё орқали, Қирғизистондан Наманган ва Андижон вилоятлари орқали, Қозоғистондан Тошкент вилояти орқали республикага контрабанда йўли билан олиб кирилган.
Мазкур хавф-хатарларга қарши ҳуқуқни муҳофаза қилувчи органлар томонидан кескин чоралар кўрилмоқда. Ҳозирда уюшган наркожиноий гуруҳлар фаолиятини тўлиқ аниқлаш, фош этиш ва чек қўйишга қаратилган комплекс тезкор-қидирув тадбирлари давом эттирилмоқда.
Телеграм ижтимоий тармоғида “@stopnarko_bot” ботига келиб тушаётган миллионлаб мурожаатлар бу ҳолатга жамият бефарқ эмаслигини кўрсатади. Сиз ҳам бефарқ бўлманг, гиёҳвандликка қарши курашишда иштирок этиб, фарзандларингиз, жамият келажагини асранг.
Н.Абдураимова, ЎзА
