Ўзбекистон – Туркия: ҳамкорлик стратегик шериклик даражасига кўтарилди
Сенатнинг Халқаро муносабатлар, ташқи иқтисодий алоқалар, хорижий инвестициялар ва туризм масалалари қўмитаси раиси, “Ўзбекистон - Туркия” парламентлараро ҳамкорлик гуруҳи ҳамраиси Алишер Аъзамхўжаев Туркия Республикаси “Буюк Бирлик” партияси раиси Мустафо Дестижи билан учрашди.
Учрашувда икки мамлакат ўртасида парламентлараро, савдо-иқтисодий ва маданий-гуманитар ҳамкорликни янада кенгайтириш масалалари муҳокама қилинди.
Икки давлат раҳбарларининг сиёсий иродаси ва ўзаро ишончга асосланган алоқалари натижасида Ўзбекистон - Туркия ҳамкорлиги стратегик шериклик даражасига кўтарилгани қайд этилди. Кейинги йилларда дўстона алоқалар, шу жумладан, парламентлараро мулоқот барча соҳаларда изчил ривожланиб бораётир.
Парламентлараро ҳамкорликни янада фаоллаштириш, жорий йил апрель ойида Истанбул шаҳрида Олий Мажлис Сенати ва Туркия Буюк Миллат Мажлиси ўртасида имзоланган “2026 - 2027 йилларга мўлжалланган “Йўл харитаси” бандларини бажаришда ҳамкорлик қилишга келишилди.
Н.Абдураимова, ЎзА
