Ўсмир ўгай онасини нега ўлдирди? (+видео)
ЎзА лойиҳаси: Маҳкумлар қисмати
Маҳкумлар қисмати энг оғир қисмат эканини доим таъкидлаймиз. Чунки, панжаралар ортида ўтаётган умрнинг ҳар лаҳзаси афсус ва надоматга тўла бўлади.
Зеро, улар жиноятга қўл урмаганида, эркин яшаши, орзу умидларини рўёбга чиқариши мумкин эди. Панжара ортидагилар ҳали катта ҳаётга қадам қўймаган ўсмирлар бўлса, бу янада аянчлироқ. Ахир умрнинг қандай кечиши, йўл бошида ташланган қадамларга кўп жиҳатдан боғлиқ.
Зангиота туманидаги тарбия колониясида сақланаётган ўсмирлар қўл урган жиноятларга назар солсангиз, уларнинг ҳаммаси ота-онанинг фарзанд тарбиясига бефарқлигига бориб тақалади. Зотан, ўғрилик, талончилик, наркокурьерлик ва ҳатто, қотиллик тасодифан юз берадиган жиноятлар эмас.
Суҳбатдошимиз Асилбек Қашқадарё вилоятининг Китоб туманида туғилган. Бир қарашда кўзлари маъюс ва маъсум бу йигитчани жиноятчи, дейиш қийин. Табиатан тортинчоқ бу боланинг бировга озор бериши аслида даргумон.
Аммо у ҳали гўдаклигида ота-онасининг ажрашиб кетгани, аввал она меҳрига зор болакай отаси қайта уйланганидан кейин ота меҳридан ҳам мосуво бўлган.
Отанинг рўзғор ташвишлари билан уйда кам бўлиши, кейинчалик хорижга ишга кетгани, ўгай онага болани камситиш, азоб бериш учун шароит яратиб берган. Ҳали ёш бола эканида бошланган таҳқирлаш бола балоғат ёшига етгунича йиғилиб, улкан ички нафратни шакллантирди.
– Ўгай онам уйимизга келганида олти ёшда эдим, – дейди Асилбек. – Аввал синглим, кейин укам туғилди. Мени эса ёқтирмасди, доим ажратишга уринар, кўпинча уйдан чиқариб юборар эди. Шундай пайтлари бувимникига борардим. Бувим эса мени уйга олиб келиб қўярди. Ўша куни укам билан тортишиб қолдик. Қўлимда турган магнитни бермаганимга у хархаша қилиб турганида ўгай онам келиб қолди. Мени ҳақоратлаб, уриб кетди. Қарасам, қўлим етадиган жойда пичоқ турган экан, шартта олиб унга тиқиб юбордим. Пичоқ ўгай онамнинг бўйнига санчилди. Мен ўзимни йўқотиб қўйдим. Ўгай онам бўлса менга “мени кечир”, – деди. Мен эса уйдан чиқиб кетдим.
Бу воқеа юз берганида Асилбек 16 ёшда эди. Бехосдан қилган ишидан қўрқиб кетган бўлса ҳам “тез ёрдам” чақириши кераклигини англади. Аввал “тез ёрдам”га, кейин бувисига қўнғироқ қилиб, юз берган воқеани айтди.
“Тез ёрдам” етиб келганида эса ўгай она олган тан жароҳати оқибатида ҳаётдан кўз юмган эди.
Асилбек эса ички ишлар органига олиб кетилди. Сўроқлар, суҳбатлардан кейин суд бўлиб ўтди. У етти йил муддатга озодликдан маҳрум этилди.
Тарбия колониясига келганига бир йилдан ошган бўлса ҳам у қотиллик қилганига ўзи ҳам ишона олмайди. Қўрқинчли туш каби ўша кунни эслайверади.
Асилбек қамалганидан кейин ота ҳам Россиядан уйга қайтди. Ҳозир ўғлидан тез-тез хабар олади. Ўғлининг китоб ўқишга қизиқиши, касб-ҳунар эгаллашга бўлган иштиёқи отани мамнун қилади. Вақтида ўғли билан ўзи шуғулланмаганига афсус чекади.
Бироқ халқимизда сўнгги пушаймон, ўзингга душман, деган нақл бекор айтилмаган. Бу ҳар бир ишни фурсат борлигида қилиш, кейин аттанг қилиб қилмаслик маъносида айтилади.
Айниқса, фарзанд тарбиясида ҳар бир дақиқа ғанимат. Бўлмаса бўш қолган дақиқаларни ёмонлик эгаллаб олиши ҳеч гап эмас. Қачонки, бунга йўл қўйилса нафақат боланинг ҳаёти барбод бўлади, балки ота-онанинг ҳам юзи бир умрга шувут бўлади.
Шундай экан, ҳар бир онни ғанимат билиб, болалар тарбиясига жиддий қараш кераклигини унутмайлик.
<iframe width="650" height="420" src="https://www.youtube.com/embed/u-95AMNHC7Y" title="O‘smir o‘gay onasini nega o‘ldirdi?" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>Норгул Абдураимова, Нишонбой Абдувоитов (видео), ЎзА
