Нью-Йоркда АҚШ ва Эрон музокара ўтказди
Эрон ташқи ишлар вазири Аббос Арағчий Нью-Йоркда АҚШ Президенти Дональд Трампнинг махсус вакиллари Стив Уиткофф ва Жаред Кушнер билан учрашув ўтказди. Ислом Республикаси давлат телевидениеси тасдиқлашича, БМТ Бош Ассамблеяси тадбирларида иштирок этиш учун келган эронлик мулозим ва америкаликлар ўртасидаги ушбу суҳбат мезбон томоннинг қатъий сўровига биноан ташкил этилган.
Қарийб уч соат давом этган мулоқот давомида Теҳрон томони Ҳўрмуз бўғози орқали кема қатновини тиклаш масаласида ўз талабини илгари сурган: АҚШ жорий этган денгиз қамалини зудлик билан бекор қилиш, Эроннинг музлатиб қўйилган молиявий активини тўлиқ озод этиш ва “қаршилик фронти” ҳаракат қилаётган барча ҳудудларда ҳарбий ҳаракатни тўхтатиш.
“Анадолу” ёзишича, мазкур учрашув жорий йил июнь ойида Теҳрон ва Вашингтон ўртасида келишув имзолангандан сўнг авж олган можаро асносида икки мамлакат юқори мартабали вакиллари илк бор юзма-юз келган. Трамп музокара ижобий ва муваффақиятли кечганини маълум қилган.
Ф.Яхшибоева, ЎзА
