Нодирбек Ёқуббоев “Freestyle Friday” турнирида совриндор бўлди
Онлайн тарзда ўтказиб келинаётган “Freestyle Friday” турнирининг кеча якунланган баҳсларида истеъдодли шахматчимиз Нодирбек Ёқуббоев муваффақиятга эришди.
11 та турдан иборат мусобақада Ёқуббоев (8 та ғалаба, 1 тадан дуранг ва мағлубият кўрсаткичи ҳолатида) 8,5 очко жамғаришга муваффақ бўлди.
Ушбу натижа орқали терма жамоамиз аъзоси турнирда 2-ўринни эгаллади ва 250 АҚШ долларини қўлга киритиш билан бирга “Freestyle Friday” рейтинг жадвали учун 7 очко жамғарди.
Турнирда 1-ўрин Нодирбек сингари 8,5 очко тўплаган германиялик Винсент Кеймерга, 3-ўрин эса АҚШ вакили Ҳанс Ниеманнга насиб этди.
Эслатиб ўтамиз, ушбу онлайн мусобақалар орқали тўпланган баллар эвазига бир нафар шахматчи 2027 йилги “FIDE Freestyle” Жаҳон чемпионати йўлланмасига эга чиқади.
Т.Рўзиев, ЎзА
