Мусобақа иштирокчилари дўстлик учрашувида
ФОТОРЕПОРТАЖ
Бухоро яна бир бор халқаро спорт ва маданият чорраҳасига айланмоқда. V Халқаро жамоавий улоқ-кўпкари турнири нафақат қизғин баҳслар, балки самимий дўстлик учрашувлари билан ҳам аҳамият касб этмоқда.
Турли давлатлардан ташриф буюрган чавандозлар бу ерда нафақат ғалаба учун, балки ўзаро ҳурмат ва бирдамлик руҳини мустаҳкамлаш мақсадида жам бўлган. Ўзбекистон, Қозоғистон, Қирғизистон, Хитой ва Россия жамоалари таркибидаги тажрибали спортчилар ўз маҳорати ва фидойилиги билан ажралиб турмоқда.
Дўстона учрашувлар давомида иштирокчилар Бухоронинг бой тарихий муҳитидан илҳом олиб, миллий чавандозлик анъаналарининг чуқур илдизларга эга эканини яна бир бор ҳис этди. Бу каби мусобақалар халқлар ўртасидаги маданий алоқаларни мустаҳкамлашга хизмат қилмоқда.
Тадбир қатнашчилари таъкидлаганидек, мазкур турнирда нафақат куч ва маҳорат, балки дўстлик ва ўзаро ҳурмат ҳам устувор аҳамият касб этмоқда. Самимий мулоқотлар ва тажриба алмашувлар спортнинг тарбиявий аҳамиятини янада намоён этди.
Хитой жамоаси вакиллари яратилган шароитлар, мусобақанинг юқори савияда ташкил этилгани, айниқса, хавфсизлик ва тиббий хизматга қаратилаётган эътиборни алоҳида эътироф этди.
[gallery-28421]
Дарҳақиқат, Бухорода ўтаётган ушбу халқаро турнир спорт орқали халқларни яқинлаштириб, дўстлик ва ҳамжиҳатликни мустаҳкамлашда муҳим аҳамият касб этмоқда.
Тоҳир ИСТАТОВ (сурат), ЎзА
