Мемлекет басшысы Ферғанадағы IT-парк қызметімен танысты
Президент Шавкат Мирзиёев Ферғана қаласындағы IT-парк кешенінде жасалған жағдайлармен танысты.
Аталған кешен Мемлекет басшысының 2024 жылғы тамыздағы сапары барысында берілген тапсырмалар негізінде салынған. 150 миллиард сум бюджет қаражаты есебінен тұрғызылған нысан бір мезетте 200-ге дейін пайдаланушыға қызмет көрсетеді. Жылына 3 мыңнан астам жасты оқытып, оларды практикалық жобаларға тарту және IT қызметтерін көрсету мүмкіндігі жасалған.
Орталықта фрилансерлер мен бағдарламашылар үшін заманауи коворкинг ортасы, ал резидент-компаниялар үшін толық жабдықталған кеңселер ұйымдастырылған. Мұнда білім беру, өндіріс және қызмет көрсету үдерістері өзара байланыста жолға қойылған. Қалыптасқан инфрақұрылым жастардың өзін-өзі жұмыспен қамту мүмкіндігін кеңейтіп, тұрақты табыс табуына ықпал етеді.
Атап өтілгендей, кейінгі жылдары Ферғана облысында IT қызметтер көлемі 4 есеге өсіп, экспорт 23 миллион доллардан асты. Қазіргі таңда өңірде «IT-Парк» резиденттерінің саны 139-ға жеткен. 2025 жылы 22,7 миллион доллар көлемінде IT қызметтері экспортталған.
Жаңа парк аясында резиденттер санын 200-ге жеткізу, 700 жаңа жұмыс орнын ашу, қызмет көлемін арттыру және 30 миллион долларлық экспортқа қол жеткізу жоспарланған.
Алдағы уақытта бұл кешенде жасанды интеллект технологияларының хабын құру, басқару жүйелерін цифрландыруға бағытталған жобаларды іске асыру көзделген. Сонымен қатар жасанды интеллект, бағдарламалау, графикалық дизайн, компьютерлік сауаттылық және ағылшын тілі бойынша заманауи оқу курстары ашылады. Стартаптар үшін венчурлық қаржыландыру, гранттар және акселерация бағдарламалары енгізіледі.
Мемлекет басшысы парк резиденттері және IT саласында жұмыс істеп жүрген жастармен кездесіп, олардың бастамалары мен идеяларын қолдады.
