Марказий банк ипотека фоизларини очиқлади

Ўзбекистон Республикаси Марказий банки ипотека кредитлари бозорида шаффофликни ошириш мақсадида ўртача фоиз ставкаларини мунтазам эълон қилишни бошлади. Бу амалиёт аҳоли учун молиявий қарорлар қабул қилишда муҳим ахборот манбаи бўлиб хизмат қилади.

2026 йил 20 апрель ҳолатига кўра, тижорат банклари томонидан аҳолига ажратилган иккиламчи ипотека кредитлари бўйича ўртача фоиз ставкаси 23,5 фоизни ташкил этди.

Шу билан бирга, амалдаги фоиз ставкалари банклар кесимида 18,0 фоиздан 26,0 фоизгача бўлган диапазонда шакллангани қайд этилмоқда. Бу эса молия бозорида рақобат муҳити мавжудлигини ва кредит шартларининг банк сиёсатига кўра фарқ қилаётганини кўрсатади.

Қайд этилишича, ипотека ставкалари тўғрисидаги очиқ маълумотларнинг эълон қилиниши аҳолига энг мақбул шартларни танлаш имконини беради, шунингдек, бозорда соғлом рақобатни рағбатлантиради.

Марказий банк келгусида ҳам ипотека бозоридаги ҳолатни доимий мониторинг қилиб бориш ва аҳоли учун қулай ахборот муҳитини яратишга қаратилган ишларни давом эттириши кутилмоқда.

Ш.Маматуропова, ЎзА