Камилла Раҳимова WTA рейтингида тарихий натижани қайд этди
Ўзбекистонлик теннисчи Камилла Раҳимова жаҳон рейтингида ўзининг энг яхши кўрсаткичига эришди. Халқаро аёл теннисчилар ассоциацияси (WTA) томонидан эълон қилинган навбатдаги рейтингда ҳамюртимиз бирданига 22 поғона юқорилаб, 44-ўринни банд этди. Бу унинг профессионал фаолиятидаги энг юқори натижадир.
Мамлакатимизнинг яна бир етакчи теннисчиси Мария Тимофеева ҳам рейтингдаги мавқеини яхшилади. Икки поғона юқорилаган спортчимиз 70-ўриндан жой олди. Афсуски, Полина Кудерметова икки поғона шўнғиб, 93-ўринни эгаллади.
Дарвоқе, Камилла Раҳимованинг рейтингда юқорилаши мамлакатимизнинг биринчи рақамли теннисчиси дея эътироф этилишига сабаб бўлди.
Шунингдек, Севиль Юлдашева ҳам жадвалда уч поғона олдинлаб, 928-ўринга кўтарилди. Лайма Владсон, Милана Масленкова ва Дарья Шубина ҳам янги рейтингда бироз ортга сурилди.
Рейтинг пешқадамлиги эса 8099 очко жамғарган қозоғистонлик Елена Рибакина қўлида. Беларуслик Арина Соболенко 6485 очко билан иккинчи, россиялик Мирра Андреева 6306 очко билан учинчи ўринда бормоқда.
Жавоҳир Тошхўжаев,
ЎзА
