Жиззахда тадбиркорлик ривожланмоқда

Мамлакатимизда тадбиркорлик муҳити тобора эркинлашиб, ишбилармонлик ташаббуслари учун кенг йўл очилмоқда. Бугун бу жараён нафақат рақамларда, балки ҳаётнинг ўзида — ҳудудлар қиёфасидаги янгиланиш, бозорлар тўкинлиги ва янги иш ўринларининг кўпайишида яққол намоён бўлмоқда.

Ўзбекистон Республикаси Миллий статистика қўмитаси маълумотларига кўра, 2026 йил 1 апрель ҳолатига республика бўйича 577 минг 200 та корхона ва ташкилот фаолият юритмоқда. Бу кўрсаткич ўтган йилнинг шу даврига нисбатан 41 минг 300 тага ёки 7,7 фоизга ошгани иқтисодиётда барқарор ўсиш суръатлари шаклланаётганидан далолат беради. Бу рақамлар ортида минглаб инсонларнинг меҳнати, қатъияти ва эртанги кунга бўлган мустаҳкам ишончи мужассам.

Жиззах вилоятида  26 минг 741 та корхона ва ташкилот самарали фаолият кўрсатмоқда. Бу эса кичик бизнес ва хусусий тадбиркорлик иқтисодиётнинг мустаҳкам таянчига айланаётганини англатади. Зеро, ҳар бир янги корхона  бу янги имконият, янги иш ўрни ва тараққиёт сари ташланган яна бир қатъий қадамдир.

Сўнгги йилларда вилоятда саноат зоналари барпо этилиб, кичик саноат корхоналари, агробизнес лойиҳалари ва хизмат кўрсатиш тармоқлари жадал ривожланмоқда. Айниқса, қишлоқ хўжалиги маҳсулотларини қайта ишлаш, қурилиш материаллари ишлаб чиқариш ҳамда логистика хизматлари соҳаларидаги лойиҳалар ҳудуд иқтисодиётига янги суръат ва мазмун бағишламоқда. Бу эса хомашёни тайёр маҳсулотга айлантириш орқали қўшимча қиймат занжирини мустаҳкамлашга хизмат қилмоқда.

Тадбиркорликни қўллаб-қувватлашга қаратилган давлат сиёсати бу ютуқларнинг мустаҳкам пойдеворидир. Хусусан, Президентимизнинг 2025 йил 19 августдаги “Ўзбекистон Республикаси Президентининг тадбиркорлар билан V очиқ мулоқотида белгиланган вазифаларни амалга ошириш чора-тадбирлари тўғрисида”ги ҳамда 2022 йил 28 январдаги “2022 – 2026 йилларга мўлжалланган Янги Ўзбекистоннинг тараққиёт стратегияси тўғрисида”ги фармонлари тадбиркорликни ривожлантириш, хусусий мулк дахлсизлигини таъминлаш ва ишбилармонлик муҳитини янада эркинлаштиришга хизмат қилмоқда. Мазкур ҳужжатларда белгилаб берилган устувор вазифаларнинг амалдаги ижроси жойларда, жумладан, Жиззах вилоятида аниқ натижаларга айланаётгани эътиборлидир.

Мутахассислар таъкидлашича, солиқ ва кредит имтиёзлари, инфратузилманинг изчил яхшиланиши, муҳандислик-коммуникация тармоқларининг кенгайиши ҳамда инвестиция лойиҳаларининг кўпайиши тадбиркорлик субъектлари сонининг янада ортишига хизмат қилади. Энг муҳими, бу жараён аҳоли бандлигини таъминлаш, даромадларни ошириш ва фаровонликни юксалтиришда муҳим омилга айланмоқда.

Мухтасар айтганда, Жиззах вилоятида иқтисодий фаолликнинг ортиши  бу шунчаки статистик ўсиш эмас, балки изчил ислоҳотларнинг ҳаётий самарасидир. Бу  имкониятни қадрлаган, меҳнатни эъзозлаган ва келажак сари ишонч билан интилаётган ҳудуднинг равшан манзарасидир.

Абдужалол Қаюмов, ЎзА мухбири