Жиззах–Хитой мулоқоти: инвестиция учун янги майдон
Жиззах вилояти ҳокими Улуғбек Мустафоев бошчилигидаги делегациянинг Хитой Халқ Республикасига амалий хизмат сафари мамлакатимизда инвестициявий дипломатия изчил ва манзилли йўлга қўйилганининг яна бир амалий ифодаси бўлди.
Хизмат сафарининг биринчи куни Хенан провинциясида ўтди ва унда саноат кооперацияси, экспорт, юқори технология ҳамда ҳудудлараро шериклик масалалари асосий муҳокама мавзусига айланди.
Жумладан, вилоят делегацияси “Huali” ва “Wodashe E Industrial” компаниялари қароргоҳида ташкил этилган бизнес мулоқотларда иштирок этди. Тадбирда 70 дан ортиқ хорижий компания вакиллари қатнашиб, Жиззах вилоятининг инвестициявий салоҳияти, эркин иқтисодий зоналари, саноат инфратузилмаси ва экспорт имкониятлари бўйича тақдимотлар ўтказилди.
Сўнгги йилларда Президент Шавкат Мирзиёев раҳбарлигида ҳудудларга хорижий инвестицияларни фаол жалб этиш, маҳаллий саноатни глобал занжирларга интеграция қилиш ва экспортбоп маҳсулотлар ишлаб чиқаришни кенгайтириш устувор вазифага айланди. Хусусан, давлат раҳбарининг инвестиция муҳитини яхшилаш, ташқи иқтисодий алоқаларни кенгайтиришга қаратилган фармон ва қарорлари жойларда амалий натижа бераётгани бугунги каби хизмат сафарларида яққол намоён бўлмоқда. Ўзбекистон Президентининг Хитой компаниялари билан инвестициявий ҳамкорликни кенгайтириш бўйича ўтказаётган мунтазам учрашувлари ҳам ҳудудлар учун янги имконият эшикларини очмоқда.
Айниқса, Жиззах вилоятида кейинги йилларда ташкил этилган саноат зоналари, муҳандислик-коммуникация тармоқларининг янгиланиши ва тадбиркорлар учун яратилган енгилликлар хорижий инвесторлар қизиқишини оширмоқда. Бир вақтлар асосан аграр ҳудуд сифатида қаралган вилоят бугун машинасозлик, қурилиш материаллари, тўқимачилик ва қайта ишлаш саноатида йирик лойиҳаларни қабул қилаётган ҳудудга айланмоқда.
Ташриф доирасида Хитой компаниялари томонидан Жиззахда амалга оширилиши мумкин бўлган янги инвестиция лойиҳалари юзасидан таклифлар билдирилди. Учрашувлар якунида эса ўзаро ҳамкорлик меморандумлари имзоланди. Бу эса келишувлар қоғозда қолиб кетмаётгани, балки аниқ иқтисодий манфаат ва ишлаб чиқариш қувватларига хизмат қилиши билан аҳамиятлидир.
Бугун глобал иқтисодий рақобат шароитида ҳудудларнинг ташқи бозорга чиқиши, инвестиция учун кураши ва замонавий технологияларни жалб этиши муҳим масалага айланган. Шу нуқтаи назардан, Жиззах делегациясининг Хитойга ташрифи фақат навбатдаги хизмат сафари эмас, балки ҳудуд иқтисодиётини янги босқичга олиб чиқишга қаратилган амалий қадам сифатида аҳамият касб этади.
Абдужалол Қаюмов, ЎзА мухбири
