Жанговар спорт турлари бўйича ноқонуний мусобақа ташкил этиш жиноий жавобгарликка сабаб бўлади
Сўнгги пайтларда уюшган тарзда содир этилаётган безорилик жиноятлари кузатилмоқда. “Кўча” деган атама пайдо бўлди. Жумладан, охирги беш йилда 77 та уюшган безорилик юз берган. Бу аҳолининг хавфсиз яшаш муҳитига салбий таъсир кўрсатади. Қонунчилигимизда эса айнан уюшган гуруҳлар томонидан безорилик кўринишидаги жиноятлар содир этганлик учун жавобгарлик кўзда тутилмаган.
Бугун Олий Мажлис Қонунчилик палатасидаги Ўзбекистон Экологик партияси фракциясининг йиғилишида "Ўзбекистон Республикасининг айрим қонун ҳужжатларига уюшган ва жамоат жойларидаги жиноятчиликка қарши курашишнинг жиноий-ҳуқуқий механизмларини янада кучайтиришга қаратилган ўзгартириш ва қўшимчалар киритиш тўғрисида"ги қонун лойиҳаси муҳокама қилинди.
Мазкур қонун лойиҳаси билан Ўзбекистон Республикасининг Жиноят ва Маъмурий жавобгарлик тўғрисидаги кодексларига бир қатор ўзгартиришлар киритилмоқда. Жумладан, уюшган тарзда содир этилган безорилик жиноятлари учун жавобгарлик кучайтирилмоқда.
Шунингдек, жиноий уюшма фаолиятини молиялаштирганлик, жиноий уюшма ташкил этишга ёки жиноий уюшма томонидан содир этилган жиноятларни яширишга ҳомийлик қилганлик учун ҳам жавобгарлик кучайтирилмоқда. Жиноий уюшма фаолиятини молиялаштирганлик учун 5 йилдан 10 йилгача озодликдан маҳрум этиш жазоси таклиф этиляпти. Бунда муддатидан олдин озод қилиш имконияти қўлланилмайди.
Бундан ташқари, жанговар спорт турлари бўйича мусобақаларни қонунга хилоф равишда ташкил этганлик ёки ўтказганлик, бундай мусобақаларда иштирок этганлик учун ҳам маъмурий жавобгарликни кўзда тутувчи ўзгартириш ва қўшимчалар киритилмоқда.
Қайд этилганидек, авваллари мамлакатимизда аралаш жанг (MMA) спорт турлари тақиқланган эди. Кейинчалик бунга қонуний рухсат берилди. Аммо яширинча, ноқонуний равишда аралаш жанг (MMA) ва шунга ўхшаш мусобақаларни ўтказиш ҳолатлари учраб турибди. Ички ишлар вазирлигининг маълумотларига кўра, бу борада 87 та мурожаат келиб тушган. Биргина 2025 йилда 3 та ана шундай ноқонуний мусобақа ўтказилгани аниқланган. Эндиликда жанговар спорт турлари бўйича ноқонуний мусобақалар жиноий жавобгарликка сабаб ўлади.
Муҳокамаларда бир қатор саволлар ўртага ташланди ва тегишли жавоблар қайтарилди. Таъкидланганидек, кучайтирилаётган таъсир чоралари мамлакатимизда уюшган жиноятчиликка қарши курашиш самарадорлигини оширишга, жамоат тартибини сақлаш ҳамда фуқаролар хавфсизлигини таъминлашга қаратилган ҳуқуқий чораларни кучайтиришга хизмат қилади.
Муҳтарама Комилова, ЎзА
