Jahon chempionatida bokschilarimiz porlamoqda

Chernogoriyaning Budva shahrida 19 yoshgacha bo‘lgan charm qo‘lqop ustalari o‘rtasida o‘tkazilayotgan jahon chempionatida O‘zbekiston yoshlar terma jamoasi a’zolari muvaffaqiyatli ishtirok etmoqda.

Chempionatning -55 kg. vazn toifasidagi bahslarida ishtirok etayotgan Elyor Rustamov ilk jangini angliyalik Reuben Xutsmannga qarshi o‘tkazdi. Bellashuvda bokschimiz raqibini 5:0 hisobida taslim etdi. Shuningdek, -85 kg. vaznda yurtimiz sharafini himoya qilayotgan Sardorbek Bahromxo‘jayev livanlik Adam Madaaranini birinchi raundda texnik nokaut bilan mag‘lubiyatga uchratdi.

Jahon chempionatining -50 kg. vazn toifasida Amirjon Subhonov meksikalik Gayel Rivasga kutilmaganda imkoniyatni boy berib qo‘ydi.

Bugun, 19-oktabr kuni jahon chempionatida O‘zbekiston terma jamoasining quyidagi 4 nafar vakili ringga ko‘tariladi:

-54 kg: (qizlar): Shodiyona Meliqo‘ziyeva — Siryu Yan (Xitoy);

-60 kg (yigitlar): Muhammad Rizo Ukimov — Umar Ibaxiyev (Rossiya);

-70 kg: Zulfiqor Adhamjonov — Muhammad Monsef Benmazuz (Jazoir);

-75 kg: Suhrob Rahmatullayev — Ramazan Amir (Qozog‘iston).

Javohir Toshxo‘jayev,

O‘zA