Жаҳон чемпионати тарихи. Уругвай-1930
Жорий йилнинг июнь-июль ойларида АҚШ, Мексика ва Канада яшил майдонлари жаҳон чемпионати баҳсларига мезбонлик қилади. Мундиал стартидан аввал унинг тарихига юзланамиз.
Жаҳон чемпионати баҳслари 1930-йилнинг 13-30-июль кунлари оралиғида Уругвайда бўлиб ўтган. Илк мундиалда 13та миллий терма жамоа чемпионлик учун баҳсларга киришган. Турнирда Европа қитъаси шарафини Франция, Югославия, Руминия ва Белгия терма жамоалари ҳимоя қилган. Жанубий Америкадан эса Аргентина, Бразилия, Чили, Парагвай, Перу, Боливия ҳамда мезбон Уругвай терма жамоалари иштирок этган. Бундан ташқари, АҚШ ва Мексика ҳам ушбу мундиалда ғолиблик учун кураш олиб борган.
Жамоалар 4та гуруҳга бўлинган ҳолда, баҳсларга киришган. "А" гуруҳидан Аргентина, Чили, Франция ва Мексика терма жамоалари жой олган. Аргентина терма жамоаси ўтказилган 3 турдан сўнг 6 очко жамғарган ҳолда, ярим финал йўлланмасини қўлга киритган. "Б" гуруҳида эса Югославия, Бразилия ва Боливия жамоалари жойлашган. Якунда Европа қитъаси вакили ушбу тўртликда етакчилик қилиб, ярим финалга йўл олган. "C" гуруҳида мезбон Уругвай терма жамоаси Руминия ва Перудан устун келиб, кейинги босқичга йўл олган бўлса, сўнгги гуруҳда АҚШ терма жамоаси Парагвай ва Белгиядан устун келган. Ярим финалда Уругвай Югаславияни, Аргентина эса АҚШни бир хил 6:1 ҳисобида мағлуб ўтиб, финал йўлланмасини қўлга киритган эди. Монтевидеода бўлиб ўтган финалда мезбонлар қитъадошларини 4:2 ҳисобида мағлуб этиб, жаҳон чемпионатининг илк чемпионига айланган эди.
Турнирнинг жами 18та учрашувида умумий 70 гол урилган. Аргентина терма жамоаси мусобақа давомида энг кўп гол урган жамоага айланган (18та). Белгия ва Боливия терма жамоалари умуман рақиб дарвозасини ишғол эта олмаган.
Ушбу мақола jch.uza.uz сайтида эълон қилинган. Футбол мавзусидаги мақолаларни ушбу сайтда ўқишингиз мумкин.
