Ишонч билан одимлаётган янги Ўзбекистон
Халқаро эътироф
Катта ютуқлар, ўзига хос юксалишлар, индустриал янгиланишлар, кенг кўламли бунёдкорлик ишларининг жадаллик билан амалга оширилиши, ҳар бир соҳага ўзига хос ракурсларда ёндашув асосида яратилган янгиликлар ҳамиша дунё ҳамжамиятининг эътиборини тортган. Олдин ҳам шундай бўлган, бундан кейин ҳам шундай бўлиб қолади.
Бунга тарихда мисоллар кўп. Парижда Эйфель минорасининг бунёд этилиши дейсизми, қақраб ётган араб чўлларида бир-биридан муҳташам кентлар қурилишини оласизми, Сингапур давлатининг тез суратда ривожланишими... ҳамма-ҳаммасида шу, эски ҳақиқат мужассам – шижоат, интилувчанлик, ташаббус, очиқлик, адолатли ва кенг қамровли саъй-ҳаракат.
Бугун тобора янгиланиб бораётган Янги Ўзбекистонга дунёнинг қизиқиши, эътибори ортаётганининг туб замирида ҳам айни ҳақиқат мужассам.
Жонажон диёримизда қисқа фурсатда бири-биридан такрорланмас мажмуалар, боғлар, майдонлар, мавзелар қад ростлади, юзлаб тарихий масканлар қайта обод этилдики, уларни санаб адоғига етолмайсан, киши.
Халқимизда “Юрган – дарё, ўтирган – бўйра”, деган гап бор. Шу маънода бугун юртимизда амалга оширилаётган кенг кўламли ишлар, халқаро майдондаги тадбирларда қўлга киритилаётган натижалар туфайли Ўзбекистон жаҳоннинг турли масканларида эсга олинмоқда. Бу, она юртимиз номи, унинг таровати, шиддатли виқори жаҳон бўйлаб кезаётганидан далолат, дейиш мумкин.
Жорий йил апрель ойининг биринчи ўн кунлигида Халқаро олимпия қўмитаси тизимидаги “Inside The Games” интернет нашрида испаниялик журналист Даниэль Сорианонинг мақоласи эълон қилинди. “Uzbekistan embraces weightlifting with new training hub” номли кенг қамровли мақола орқали мамлакатимиз дунё спорт оламида юксак эътибор қозонаётганлиги аниқ мисоллар, таҳлиллар асосида кўрсатиб берилган.
Испаниялик журналист ўзининг “Ўзбекистонда янги машғулот марказининг бунёд этилиши оғир атлетика спортини фаол ривожлантирмоқда” сарлавҳали мақоласида мамлакатимизда миллий дастур ривожланишда давом этаётгани, юртимизда ташкил этилган “Акбар Жўраев номидаги оғир атлетика мактаби” бу – “ёрқин келажак”ка ғамхўрлик эканини олқишлади. Буни Марказий Осиёда спортни ривожлантириш учун муҳим қадам, дея эътироф этди.
Мақолада шунингдек, Халқаро оғир атлетика федерацияси (IWF) президенти Муҳаммад Жалуднинг сўзларини келтириб, “Акбар Жўраев номидаги оғир атлетика мактаби”нинг иш бошлаш тантаналари “Халқаро ривожланиш ва тинчлик спорти куни”га тўғри келгани, жамоаларни бирлаштириш қудратига эга эканини таъкидлаган.
“... Мамлакатда спортнинг ўсиши динамик тарзда давом этмоқда. Ўзбекистон Осиё ёшлар ўйинлари ва Ислом бирдамлик ўйинларида иккинчи ўринни, Осиё ёшлар Паралимпия ўйинларида биринчи ўринни эгаллади. Бу юртда футбол ҳам тарихий юксалишни амалга оширди. Миллий терма жамоа биринчи марта ФИФА жаҳон чемпионатига йўлланма олди.
ФИФА президенти Жанни Инфантинонинг “Ўзбекистон футбол мамлакати сифатида келажакка ишонч билан қадам ташламоқда”, дейишида ҳам улкан қараш мужассам. Ўзбекистон халқаро мезонларда янги босқичга кўтарилмоқда ва биз келажакда ажойиб натижаларга умид қиламиз...”, дейилади ушбу мақолада.
Дарҳақиқат, мамлакатимиз ҳақида, эришаётган натижалар тўғрисида бу каби чиқишлар жаҳоннинг турли нашрлари ва минбарларида кунора бот-бот янграмоқда.
Биргина Жавоҳир Синдоровнинг Номзодлар турнирида ғолиб чиқиши, жаҳон шахмат тожи учун курашиш ҳуқуқига эга бўлиши халқаро экспертлар томонидан юқори баҳоланаётгани, унинг кўрсаткичлари Карпов, Каспаров, Ананд сингари шахмат афсоналари қаторида қайд этилаётгани ифтихор саналади.
Дарҳақиқат, давлатимиз раҳбарининг очиқ ва прагматик сиёсати, шаҳду-шижоати туфайли янги Ўзбекистоннинг “олтин авлоди” тарихий ютуқлари, муваффақиятлари билан халқаро майдонда эътироф этилмоқдаки, бу, яна бир карра Президентимиз айтиб ўтганидек, “Спорт – соғлом турмуш тарзи, интизом, ватанпарварлик ва мамлакат нуфузини намоён қиладиган катта куч” эканлигини амалда намоён этмоқда.
Тўлқин РЎЗИЕВ,
ЎзА шарҳловчиси
