Ҳуқуқни муҳофаза қилиш академиясининг коррупцияга қарши курашиш ишлари халқаро эътирофга эга бўлди
Ҳуқуқни муҳофаза қилиш академиясида коррупцияга қарши курашиш бўйича миллий ва халқаро стандартларга мос бўлган, коррупция таҳдидларига барқарор тура оладиган тизим жорий этилди.
Академияда коррупцияга қарши курашишнинг комплекс тизими жорий этилиб, коррупцияга қарши курашиш бўйича ички сиёсат, манфаатлар тўқнашувини бартараф этиш, коррупциявий хавф-хатарларнинг олдини олиш, давлат харидларида шаффофликни ошириш ва бошқа шу каби йўналишлардаги 10 дан ортиқ ички идоравий ҳужжат қабул қилинди.
Академиянинг коррупцияга қарши курашиш менежмент тизими Германия халқаро ҳамкорлик жамияти (GIZ) кўмагида “CERT International” ташкилоти томонидан ISO 37001:2025 “Коррупцияга қарши курашиш менежмент тизими” халқаро стандарти бўйича аудитдан ўтказилди ва мувофиқлик сертификати берилди.
Сертификат топшириш маросимида Президент Администрацияси комплаенс хизмати, Бош прокуратура, Олий Мажлис, Ҳисоб палатаси, Ёшлар парламенти вакиллари, Академия профессор-ўқитувчилари, талабалари, докторантлари, шунингдек Европа Иттифоқининг Ўзбекистондаги ваколатхонаси, Германия халқаро ҳамкорлик жамияти (GIZ) ва бошқа ҳамкор ташкилотлар вакиллари иштирок этди.
Академияга тақдим этилган халқаро сертификат тизимда коррупцияга қарши бошқарув тизими самарали жорий этилгани, барча жараёнлар шаффофлик, ҳалоллик ва ҳисобдорлик тамойиллари асосида ташкил этилганини ҳамда халқаро талабларга тўлиқ жавоб беришини тасдиқлайди.
ISO 37001:2025 сертификати Академияда очиқлик ва шаффофликни таъминлашга хизмат қилади. Ходимларда ҳалоллик ва коррупцияга нисбатан муросасиз муносабатни мустаҳкамлайди. Манфаатлар тўқнашувининг олдини олиш ва уни самарали бошқариш механизмларини кучайтиради. Халқаро ҳамкорлар ишончини оширади ҳамда таълим ва илмий-тадқиқот фаолиятида замонавий комплаенс талабларини жорий этиш имконини беради.
Тадбир давомида Академияда прокуратура органларининг Шахсий хавфсизлик тармоқлари ходимлари иштирокида ўтказилган “Комплаенс хизматини ташкил этиш ва коррупцияга қарши курашиш масалалари” мавзусидаги махсус малака ошириш ўқув курси тингловчиларига сертификатлар топширилди.
Н.Абдураимова, ЎзА
