Хорижий тиллар бўйича энг яхши мактаблар аниқланади
Мамлакатимизда ўқувчи-ёшларнинг хорижий тилларни мукаммал ўрганиши учун кўплаб маърифий лойиҳалар ҳаётга фаол татбиқ этилмоқда. Зеро, бир эмас, бир нечта хорижий тилни мукаммал билиш бугунги кун талабига айланди.
Мактабгача ва мактаб таълими вазирлиги томонидан 17–21 август кунлари Ўзбекистон Республикаси Президенти соврини учун “Хорижий тилларни ўқитиш бўйича энг яхши мактаб” танловининг Республика босқичи ўтказилмоқда. Тошкент вилоятининг Бўстонлиқ туманидаги “Ренессанс” болалар оромгоҳида ташкил этилган танлов жараёнларида ҳудудий босқичда ғолиб бўлган жамоалар иштирок этмоқда.
Танлов давомида иштирокчиларнинг тинглаб тушуниш (listening), ўқиш (reading), ёзиш (writing) ва гапириш (speaking) кўникмалари синовдан ўтказилади.
Айтиш жоизки, “Хорижий тилларни ўқитиш бўйича энг яхши мактаб” танлови уч босқичда ташкил этилмоқда. Биринчи босқичда республика бўйича жами 8 минг 721 та мактаб иштирок этган бўлиб, унда 43 минг 605 нафар ўқувчи қамраб олинди.
Танловнинг биринчи босқичи якунига кўра, республика бўйича 208 та туман ва шаҳар мактаби танловнинг иккинчи — ҳудудий босқичига тавсия этилди. Унда энг яхши натижаларни қайд этган жамоалар республика босқичида ўзаро куч синашмоқда.
Республика босқичида 1-ўринни қўлга киритган жамоа — 500 миллион сўм, 2-ўрин эгаси — 400 миллион сўм, 3-ўринни эгаллаган жамоа — 300 миллион сўм миқдорида пул мукофоти билан тақдирланади.
Шунингдек, республика босқичи иштирокчилари ва уларнинг устозлари хорижга таълим саёҳатига юборилади. Танловнинг барча босқичлари учун тест топшириқлари иштирокчиларнинг мулоқот кўникмаларини босқичма-босқич ривожлантиришга қаратилган.
Н.Усмонова, ЎзА мухбири
