Хорижий олий таълим ташкилотларида илмий даража олган ёш мутахассисларга уй-жой сотиб олиш учун ипотека кредити ажратиш тартиби тўғрисидаги низом тасдиқланди

Ўзбекистон Республикаси Вазирлар Маҳкамаси “Нуфузли халқаро рейтинг ташкилотларининг рўйхатига киритилган хорижий олий таълим ташкилотларида илмий даража олган ёш мутахассисларга уй-жой сотиб олиш учун ипотека кредити ажратиш тартибини жорий этиш тўғрисида” қарор қабул қилди.

Унга мувофиқ, Нуфузли халқаро рейтинг ташкилотларининг рўйхатига киритилган хорижий олий таълим ташкилотларида илмий даража олган ёш мутахассисларга уй-жой сотиб олиш учун ипотека кредити ажратиш тартиби тўғрисидаги низом тасдиқланди. 

Низомда: 

тижорат банклари томонидан уй-жой сотиб олиш учун кредитларни молиялаштириш тартиби; 

илмий даражага эга 35 ёшгача бўлган мутахассисларнинг кредит олиш учун электрон тарзда рўйхатдан ўтиш тартиби; 

тижорат банклари томонидан кредит олувчиларга кредит ажратиш ҳамда кредитнинг асосий қарз тўловларини кредит олувчилар томонидан қайтариш шартлари белгилаб берилган. 

2026 йил 1 майга қадар охирги 10 йиллик рейтингда, 2027 йилдан бошлаб эса ҳар йили 10 январга қадар халқаро миқёсда тан олинган ва Ўзбекистон Республикаси билан ҳамкорлик алоқалари ўрнатилган QS (Quacquarelli Symonds) ёки THE (Times Higher Education) ёхуд ARWU (Academic Ranking of World Universities) халқаро рейтинг ташкилотлари томонидан эълон қилинган рейтингда юқори 100 талик рўйхатга киритилган хорижий олий таълим ташкилотлари рўйхати тасдиқланади ҳамда Вазирликнинг расмий веб-сайтида эълон қилиб борилади. 

Кредит Давлат бюджетидан ҳар йили бюджет қонунчилигида белгиланган тартибда Вазирликка ажратиладиган маблағлар ҳисобидан молиялаштирилади. 

Кредит Вазирликнинг Иқтисодиёт ва молия вазирлиги ҳузуридаги Ғазначилик хизмати қўмитасида очилган махсус ҳисобварақларига ажратилади. 

Кредит рейтинг ташкилотлари рўйхатига киритилган хорижий олий таълим ташкилотларида илмий даражага ҳамда банкнинг ички қоидаларига мувофиқ тўлов қобилиятига эга кредит олувчиларга ажратилади. Бунда: 

кредит олувчилар хорижий олий таълим ташкилотида ўқишни якунлаб, илмий даража берилган кунда хорижий олий таълим ташкилоти рейтинг ташкилотлари рўйхатига кирган бўлиши талаб этилади; 

кредит уй-жой сотиб олиш учун ҳар бир кредит олувчига базавий ҳисоблаш миқдорининг 2 150 бараваригача миқдорда ўн йил муддатга берилади; 

Вазирлик бюджет қонунчилигида белгиланган тартибда Вазирликка ажратилган республика бюджети маблағлари ҳисобидан тижорат банкларига кредит ажратиш учун 10 фоиз ставкада депозит жойлаштиради ҳамда тижорат банклари томонидан кредит олувчиларга 14 фоиз ставкада кредит ажратилади; 

кредит бўйича ҳисобланган фоиз тўловлари Вазирлик томонидан Давлат бюджети маблағлари ҳисобидан ҳар ой учун кейинги ойнинг 25-санасига қадар тўлиқ қоплаб берилади; 

ажратилган кредит (асосий қарз миқдори) кредит олувчилар томонидан банк билан тузилган шартномага мувофиқ кредит расмийлаштирилганидан кейинги ойдан бошлаб ўн йил давомида ҳар ойлик тўловлар асосида қайтарилади; 

Вазирлик ҳар йил якунига қадар тижорат банклари томонидан қайтарилган кредитларни Давлат бюджетига қайтаради; 

кредитни ажратиш бўйича аризалар Ўзбекистон Республикаси Ягона интерактив давлат хизматлари портали орқали қабул қилинади. 

Мазкур Низом нуфузли халқаро рейтинг ташкилотларининг юқори 100 талик рўйхатига киритилган хорижий олий таълим ташкилотларида “PhD” ва унга тенглаштирилган бошқа илмий даражага эга 35 ёшгача бўлган мутахассисларга уй-жой сотиб олиш учун ипотека кредити ажратиш тартибини белгилайди.

ЎзА