Халқаро наркотрафикнинг навбатдаги ҳолати фош этилди
Гиёҳвандлик воситаларининг ноқонуний айланмаси, хусусан, уларни хориждан мамлакатимиз ҳудудига контрабанда йўли билан олиб кириш ҳолатларига қарши курашиш бўйича тезкор тадбирлар давом эттирилмоқда.
Самарқанд вилоятида ўтказилган навбатдаги тезкор-қидирув тадбирлари натижасида катта миқдордаги гиёҳвандлик воситасининг ноқонуний олиб кирилишига чек қўйилди.
Давлат хавфсизлик хизматининг Самарқанд вилояти бўйича бошқармаси ходимлари томонидан вилоят Божхона ва Ички ишлар бошқармалари билан ҳамкорликда ўтказилган тадбир давомида Форс кўрфази мамлакатларидан бирининг 1971 йилда туғилган фуқароси қўлга олинди.
Аниқланишича, мазкур шахс ҳозирда шахсига аниқлик киритилаётган қўшни республика фуқароси билан тил бириктириб, ўзи бошқараётган «Renault» русумли юк автомашинасида гиёҳвандлик воситасини хориждан Ўзбекистонга олиб кирган.
Тезкор тадбир давомида хорижлик фуқаро вақтинча истиқомат қилаётган Иштихон туманидаги уй кўздан кечирилганда, соф оғирлиги 20 килограмм 239 грамм бўлган экстракцияли опий моддаси аниқланиб, процессуал тартибда расмийлаштириб олинди.
Таъкидланишича, гиёҳвандлик моддаси юк автомашинасининг махсус яширин жойига ҳамда иккита аккумулятор ичига яширилган ҳолда олиб келинган.
Мазкур ҳолат юзасидан хорижлик фуқаро ва бошқаларга нисбатан Жиноят кодексининг 246 ва 273-моддалари билан жиноят иши қўзғатилган. Ҳозирда тергов ҳаракатлари олиб борилмоқда, шунингдек, жиноятга алоқадор бошқа шахсларни аниқлаш чоралари кўрилмоқда.
Ҳамроз Баёнов,
ЎзА
