Халқ қабулхоналарига қанча мурожаат келиб тушган?
2026 йилнинг январь–сентябрь ойларида жисмоний ва юридик шахслардан келиб тушган мурожаатлар таҳлили аҳоли томонидан кўтарилаётган масалалар, ҳудудлар кесимидаги фаоллик ҳамда давлат ташкилотлари фаолиятига оид муҳим кўрсаткичларни намоён этди.
Жорий йилнинг январь–сентябрь ойларида жисмоний ва юридик шахслардан жами 156 мингта мурожаат келиб тушди. Шу билан бирга, 17 минг 686 та такрорий мурожаат ва 1 минг 135 та жамоавий мурожаат қайд этилган. Бу ўтган йилнинг мос даврига нисбатан 7 фоизга кам. Мурожаатлар таҳлили ҳудудлар кесимида Қашқадарё вилояти, ташкилотлар орасида Ижтимоий ҳимоя миллий агентлиги, кўтарилган масалалар бўйича эса болалар нафақаси билан боғлиқ мурожаатлар етакчи ўринда турганини кўрсатмоқда.
Ҳудудлар кесимидаги таҳлилга кўра, энг кўп мурожаат Қашқадарё вилоятидан келиб тушган бўлиб, уларнинг сони 16,8 мингтани ташкил этган.
Кейинги ўринларда Сурхондарё вилояти ва Самарқанд вилояти 16,4 мингтадан мурожаат билан қайд этилган. Тошкент шаҳри эса 16,2 мингта мурожаат билан тўртинчи ўринни эгаллаган.
Ташкилотлар кесимида энг кўп мурожаат Ўзбекистон Республикаси Ижтимоий ҳимоя миллий агентлигига келиб тушган. Ҳисобот даврида ушбу ташкилотга 30 минг 367 та мурожаат йўлланган. Иккинчи ўринда 24 минг 111 та мурожаат билан Мажбурий ижро бюроси қайд этилган. Ички ишлар вазирлигига 16 минг 449 та мурожаат келиб тушган.
Шунингдек, Камбағалликни қисқартириш ва бандлик вазирлигига 9 минг 799 та, Энергетика вазирлигига эса 9 минг 74 та мурожаат йўлланган.
Мурожаатларда кўтарилган масалалар ўрганилганда, болалар нафақаси билан боғлиқ масалалар биринчи ўринда турибди. Ҳисобот даврида ушбу йўналишда 23 минг 934 та мурожаат келиб тушган. Иккинчи ўринда 17 минг 202 та мурожаат билан алимент ундириш масаласи қайд этилган. Шунингдек, иш билан таъминлаш масаласида 3 минг 648 та, газ баллони билан боғлиқ масалалар юзасидан эса 3 минг 199 та мурожаат келиб тушган.
Ҳамроз Баёнов,
ЎзА
