Газли — чўл бағрида бунёд бўлган матонат шаҳри

Чўл бағрида шаҳар барпо этиш — оддий меҳнат эмас. Бунинг учун чексиз сабр, мислсиз матонат, оғир шароитга дош бериш ва энг муҳими, келажакка ишонч керак.

Бугун Бухоро вилоятининг Ромитан туманидаги Газли шаҳрига назар ташлар эканмиз, кўз ўнгимизда фақат кўчалар, уйлар, корхоналар ёки ижтимоий объектлар эмас, балки бир неча авлоднинг ҳаёти, меҳнати ва тақдири мужассам бўлган 70 йиллик улкан тарих намоён бўлади.

Бу тарихда қувонч ҳам, машаққат ҳам, оғир синовлар ҳам бор. Аммо унинг энг асосий белгиси — инсоннинг ўз меҳнати ва матонати билан тақдирини ўзгартира олишида.

Ана шу қутлуғ тарих — Газлининг 70 йиллиги кенг жамоатчилик иштирокида тантанали нишонланган кунда яна бир бор ёдга олинди. Тантанада меҳнат фахрийлари, ёшлар, шаҳар аҳолиси, жамоатчилик вакиллари ҳамда меҳмонлар иштирок этишди.

Вилоят ҳокими Ботир Зарипов сўзга чиқиб, Газли аҳлини қутлуғ сана билан самимий муборакбод этди.

Газлининг тарихи 1956 йилда ҳудудда йирик табиий газ захираларининг аниқланиши билан чамбарчас боғлиқ. Ўша даврда бугунги шаҳар ўрнида чўл ва кенгликлар бор эди. Кейин бу ерга геологлар, бурғиловчилар, муҳандислар, қурувчилар, энергетиклар, газчилар ва турли касб эгалари кириб келишди. Улар чўлнинг жазирама иссиғи ва оғир табиий шароитларига қарамай, бу заминда янги ҳаёт пойдеворини тикладилар.

Дастлаб ишчилар посёлкаси шаклланди. Уй-жойлар, йўллар, мактаблар, мактабгача таълим ва тиббиёт муассасалари қурилди. Газ конларининг саноат миқёсида ўзлаштирилиши, йирик магистрал газ қувурларининг барпо этилиши билан Газли мамлакатимиз газ саноатининг муҳим марказларидан бирига айланди.

1977 йилда шаҳар мақоми берилгани эса унинг тараққиётида янги босқични бошлаб берди. Аммо Газлининг ҳақиқий бойлиги ер остидаги газ эмас эди. Унинг энг катта бойлиги — инсонлари эди.

Шаҳарнинг бугунги қиёфасига пойдевор қўйган, унинг ҳар бир кўчаси, биноси ва иншоотида меҳнати қолган инсонлар хотираси Газли тарихининг энг қимматли саҳифаларидир. Шу боис юбилей тадбирида шаҳар тараққиётига муносиб ҳисса қўшган меҳнат фахрийлари — Шуҳрат Ҳайдаров, Мугалима Игиишова, Насим Ботиров, Турмуҳаммад Мирзабоев, Зуҳра Холмуродова ва бошқаларга алоҳида миннатдорлик билдирилди. Уларнинг номлари орқали Газлини барпо этган минглаб инсонларнинг фидокорона меҳнатига эҳтиром кўрсатилди.

Газлининг 70 йиллик тарихи фақат бунёдкорлик ва тараққиётдан иборат эмас. 1976 йилдаги кучли зилзила шаҳар аҳли учун оғир фожиа бўлди. Уй-жойлар вайрон бўлди, кўплаб оилалар оғир синовларга дуч келди. Бироқ зилзила биноларни вайрон қилгани билан, Газли аҳлининг руҳини синдира олмади. Шаҳар қайта тикланди. Яна янги уйлар қурилди. Ижтимоий объектлар барпо этилди. Инфратузилма янгиланди. Ҳаёт давом этди. Бу воқеа Газли тарихидаги энг таъсирчан ҳақиқатни намоён қилди: шаҳарни фақат ғишт ва бетон эмас, унинг одамлари барпо этади. Газли қайта қад ростлаган бўлса, бу — аввало, унинг инсонлари матонати, бирдамлиги ва эртанги кунга ишончи самарасидир.

Газлининг яна бир ўзига хос жиҳати — унинг кўп миллатли аҳолиси ўртасидаги аҳиллик ва ҳамжиҳатликдир. Шаҳар тараққиётига ўзбеклар билан бир қаторда қозоқ, рус, туркман, татар ва бошқа миллат вакиллари ҳам муносиб ҳисса қўшган. Бугун Газлида икки мингдан ортиқ қозоқ миллатига мансуб юртдошларимиз истиқомат қилади. Йиллар давомида турли миллат вакилларининг бир оила фарзандларидек аҳил-иноқ яшаб келаётгани — Газлининг кўзга кўринмас, аммо энг қимматли бойликларидан биридир. Чунки ҳақиқий тараққиёт фақат йўллар ва бинолар билан ўлчанмайди. У одамлар ўртасидаги ишонч, ҳурмат ва ҳамжиҳатликда ҳам намоён бўлади.

Газлининг 70 йиллиги тарихга назар ташлаш билан бирга, бугунги кунни обод этиш ва эртанги тараққиёт учун янги вазифаларни белгилаш имкони ҳам бўлди. Айни шу мақсадда шаҳарда юбилей арафасида кенг кўламли ободонлаштириш ва инфратузилма ишлари амалга оширилди. Вилоят, туман ҳокимлиги ва тегишли ташкилотлар масъулларидан иборат ишчи гуруҳлар аҳоли хонадонларига кириб, мавжуд муаммо ва мурожаатларни ўргандилар. Энг муҳими, ўрганиш билан чекланиб қолинмай, уларнинг ечими бўйича амалий ишлар бошланди. Ободонлаштириш ишларига 692 нафар ҳашарчи ва 100 га яқин техника жалб этилди. Қарийб 10 километр йўл тартибга келтирилди. Кўчаларни ёритиш мақсадида 50 та қуёш панелли кўча чироғи ҳамда 1 та трансформатор пункти ўрнатилди. 400 метр электр тармоғи янгиланди. Ичимлик суви таъминотини яхшилаш учун махсус сув ташиш автотранспорти ажратилди. Шаҳар оқова тизими тармоқларини реконструкция қилиш ишлари бошланди. Ҳудудни чиқиндилардан холи масканга айлантириш мақсадида 10 та чиқинди йиғиш контейнерлари келтирилди. Техник сув оқимини яхшилаш ва сув таъминоти барқарорлигини таъминлаш учун 120 миллион сўмлик насос агрегати ўрнатилди. Томорқа ер майдонларини суғориш учун 8,5 километр сув қувурлари тортиш ишлари ҳам олиб борилмоқда. Буларнинг барчаси бир ҳақиқатни кўрсатади: юбилей — фақат тантана эмас, балки аҳоли ҳаётида аниқ ўзгаришлар бўлишига туртки берадиган муҳим санадир.

Шаҳар аҳолисининг дам олиши ва бўш вақтини мазмунли ўтказиши учун ҳам янги имкониятлар яратилди. Газли хотира майдонининг 3 гектар ҳудуди тўлиқ текисланиб, йўлаклар асфальтланди. Томчилатиб суғориш тизими жорий қилиниб, 750 туп декоратив дарахт кўчати ўтқазилди. Бу рақамлар ортида эса яна бир эзгу мақсад — чўл бағридаги шаҳарни янада яшил ва обод масканга айлантириш ғояси мужассам. Бу ёндашув давлат раҳбари Шавкат Мирзиёев томонидан илгари сурилаётган маҳаллалар инфратузилмасини яхшилаш, ҳудудларни комплекс ривожлантириш ва одамлар ислоҳотлар натижасини кундалик ҳаётида ҳис қилиши кераклиги ҳақидаги ташаббуслар билан ҳамоҳангдир. Президент 2026 йилни “Маҳаллани ривожлантириш ва жамиятни юксалтириш йили” деб эълон қилиш ташаббусини илгари сурган ва ободлик, инфратузилма ҳамда аҳоли фаровонлигини маҳалла даражасида таъминлашни устувор вазифалар қаторига қўйган. Шу нуқтаи назардан Газлида амалга оширилаётган ишлар оддий ободонлаштириш эмас. Бу — одамлар учун муносиб ҳаёт муҳитини яратишга қаратилган ёндашувнинг амалдаги кўринишидир.

Шаҳар тараққиётининг яна бир муҳим йўналиши — аҳоли бандлиги. Хусусан, хотин-қизларнинг бандлигини ошириш мақсадида тикувчилик цехи ташкил қилиниб, “Микрокредитбанк” вилоят филиали томонидан 70 та тикув машинаси билан жиҳозланди. Яна 15 нафар фуқаронинг бандлигини таъминлаш учун “Бизнесни ривожлантириш банки” томонидан мих ва сетка ишлаб чиқаришга зарур асбоб-ускуналар келтирилди. Аҳоли тўлиқ хатловдан ўтказилиб, норасмий банд бўлган 24 нафар фуқаронинг меҳнат фаолияти расмийлаштирилди, 13 нафар фуқаро доимий ишга жойлаштирилди. Бу рақамларнинг ҳар бири ортида битта инсон, битта оила, битта тақдир турибди. Шунинг учун бандлик масаласига эътибор — статистик кўрсаткич эмас, аввало, инсоннинг эртанги кунига бўлган ишончини мустаҳкамлашдир.

Давлат раҳбари ҳам маҳаллаларда аҳоли даромадларини ошириш, тадбиркорликни ривожлантириш ва янги иш ўринлари яратишни 2026 йилдаги устувор вазифалардан бири сифатида белгилаган.

Газлида янги авлод учун ҳам имкониятлар кенгаймоқда. Ҳудуддаги 27-мактабгача таълим ташкилоти янгидан барпо этилиб, замонавий жиҳозлар билан таъминланди. Шаҳар мактабларида касб хоналари ташкил этилди, спорт заллари таъмирланди. Бир неча йиллардан буён қаровсиз ҳолда бўлган спорт мажмуаси қайта таъмирланиб, зарур спорт инвентарлари билан жиҳозланди. Айни пайтда бу ерда ўнга яқин спорт тўгараги фаолият юритмоқда.

Газли ёшлари билан бир қаторда аҳолининг барча қатламлари учун инглиз, француз ва немис тилларини ўрганиш бўйича бепул курслар ташкил этилди. Бу — чўл бағридаги шаҳар фарзандларига дунёнинг кенг имкониятларини очиш демак.

Аҳоли саломатлигини муҳофаза қилиш масаласи ҳам эътибордан четда қолмади. Вилоят соғлиқни сақлаш бошқармаси томонидан шаҳар аҳолиси чуқурлаштирилган тиббий кўрикдан ўтказилди. Тиббиёт ходимлари хонадонма-хонадон юриб, ётоқ режимидаги ва бемор фуқароларга тиббий хизмат кўрсатди. Шаҳар яқинидан ўтувчи халқаро магистрал йўл бўйида стационар тиббий пункт ташкил этилиб, тез тиббий ёрдам автомобили билан таъминланди. Бу каби ишлар замирида инсон қадрига эътибор мужассам.

Газлининг 70 йиллик юбилейи давомида ўтмиш ҳам, бугун ҳам, келажак ҳам бир саҳнада намоён бўлди. Меҳнат фахрийлари — ўтмишнинг тирик гувоҳлари. Ёшлар — келажак эгалари. Ободонлаштирилган кўчалар, таъмирланган иншоотлар, янги имкониятлар эса бугуннинг амалий натижаларидир.

Тадбирда шаҳарнинг келгуси тараққиётига доир мақсад ва вазифалар ҳам белгилаб олинди. Эндиликда янги иш ўринларини кўпайтириш, ёшларни замонавий касбларга ўқитиш, тадбиркорлик учун имкониятларни кенгайтириш, маҳаллаларни янада обод қилиш, таълим ва тиббий хизматлар сифатини ошириш, инфратузилмани такомиллаштириш борасидаги ишлар изчил давом эттирилади. Зеро, Газлининг 70 йиллиги — ортда қолган йилларни санаш эмас. Бу — бир авлоднинг меҳнатини иккинчи авлодга, бир даврнинг тажрибасини янги давр имкониятларига улаштириш палласи.

Тантана вилоят санъат усталари тайёрлаган мазмунли ва ранг-баранг концерт дастури билан давом этди. Саҳнадаги чиқишларда тинчлик ва осойишталик, меҳр-оқибат, аҳиллик ва ҳамжиҳатлик каби халқимизга хос эзгу қадриятлар тараннум этилди. Тун қаърини ранг-баранг шуълаларга буркаган мушаклар эса 70 йиллик тарихга бағишланган тантананинг ёрқин нуқтаси бўлди. Аммо байрам шу ерда тугамади. Чунки ҳақиқий тантана — эртанги кунга ишонч билан қарашдан бошланади. Газли 70 йил давомида чўлни шаҳарга, меҳнатни тараққиётга, синовларни матонатга айлантира олди. Энди унинг олдида янада катта вазифалар турибди. Янги иш ўринлари, замонавий касблар, сифатли таълим, муносиб тиббий хизмат, обод маҳаллалар, яшил ҳудудлар ва замонавий инфратузилма — булар Газлининг келгуси қиёфасини белгилайди. Чунки Газлининг 70 йиллик тарихи — кечаги кун ҳақидаги хотира эмас. У бугунги авлодга қолдирилган масъулият ва эртанги авлодга берилаётган ишончдир. Чўл бағрида бир вақтлар меҳнаткаш инсонлар қўли билан қад ростлаган Газли бугун яна бир муҳим босқич остонасида турибди. Унинг янги тарихи ҳам худди аввалгидек инсонлар билан ёзилади. Фақат бу сафар мақсад — чўл бағрида шаҳар барпо этиш эмас. Мақсад — инсон учун янада муносиб, обод, замонавий ва фаровон шаҳар барпо этиш.

Зариф Комилов, ЎзА мухбири